Presidenti ukrainas Volodymyr Zelenskyy ka theksuar rëndësinë e vazhdimit të angazhimit amerikan në përpjekjet për t’i dhënë fund luftës në Ukrainë, pas një takimi të mbajtur në Londër me liderë të “Koalicionit të Vullnetit”, ku Presidenti Donald Trump nuk ishte i pranishëm.
Në vend që të kërkonte drejtpërdrejt furnizimin me raketat amerikane Tomahawk, Zelenskyy zgjodhi të theksonte nevojën për bashkëpunim të ngushtë mes vendeve perëndimore.
“Ne nuk po kërkojmë mënyra për ta ndalur Putinin pa SHBA-në”, tha ai, duke nënvizuar se garancitë e sigurisë pas luftës nuk mund të jenë të plota pa përfshirjen e Shteteve të Bashkuara.
Zelenskyy paralajmëroi se “Putini dëshiron të na ndajë”, ndërsa kujtoi se Perëndimi ka vepruar së bashku më parë, duke furnizuar Ukrainën me raketat anglo-franceze Storm Shadow dhe më pas me raketat amerikane Atacms, një sinjal se ai shpreson që Trump të ndryshojë qëndrim për Tomahawk-ët, përcjell The Guardian.
Kryeministri britanik Keir Starmer, në të njëjtin takim, tha se “ka ende hapësirë për të vepruar në drejtim të kapaciteteve, veçanërisht atyre me rreze të gjatë”, duke sugjeruar se Mbretëria e Bashkuar po nxit aleatët të ndihmojnë Ukrainën të godasë objektiva ruse në thellësi të territorit.
Këtë javë, Ukraina përdori një raketë Storm Shadow për të bombarduar një fabrikë ruse në Bryansk që prodhonte eksplozivë dhe karburant për raketa. Megjithatë, SHBA ka refuzuar deri tani të furnizojë Tomahawk-ët, një vendim që ka shkaktuar shqetësim në Moskë.
Zelenskyy paralajmëroi për një “katastrofë humanitare” këtë dimër, duke falënderuar aleatët për mbështetjen e vazhdueshme.
“Është shumë e rëndësishme që nuk jemi vetëm, që nga fillimi i luftës, por veçanërisht tani.”- tha Zelenskyy.
Takimi në Londër u zhvillua pas vizitës së Zelenskyy-t te Mbreti Charles në Windsor dhe një takim kokë më kokë me Starmer në Downing Street. Më pas, liderët u mblodhën në Ministrinë e Jashtme për diskutime të zgjeruara.
Në takim morën pjesë fizikisht edhe Sekretari i Përgjithshëm i NATO-s Mark Rutte, Kryeministrja daneze Mette Frederiksen dhe Kryeministri holandez Dick Schoof, ndërsa pjesa tjetër e liderëve u bashkua online.
Mbledhja u zhvillua një ditë pasi liderët e BE-së nuk arritën të marrin një vendim për përdorimin e 140 miliardë eurove nga asetet e ngrira të bankës qendrore ruse për të financuar mbrojtjen e Ukrainës.
Ndërkohë, Rusia ka intensifikuar sulmet ndaj infrastrukturës energjetike ukrainase, duke lënë pa energji dhe ujë qytete si Kievi dhe Chernihivi.
