Kryetari i Grupit Parlamentar të Partisë Socialiste, Taulant Balla, gjatë një vizite zyrtare në Romë, zhvilloi një takim me Kryetarin e Komisionit për Punët e Jashtme dhe Çështjet Europiane të Dhomës së Deputetëve, Giulio Tremonti.
Në fokus të takimit ishte nënshkrimi i një marrëveshjeje bashkëpunimi mes komisioneve të përhershme të Kuvendit të Shqipërisë dhe Parlamentit Italian.
“Marrëveshje bashkëpunimi mes komisioneve të përhershme të Kuvendit të Shqipërisë dhe Parlamentit Italian (Dhoma e deputetëve dhe Senat), për çështje të interesit të përbashkët dhe politikat europiane”, shkroi Balla në rrjetet sociale.
Marrëveshja synon të forcojë lidhjet institucionale mes dy parlamenteve, duke promovuar shkëmbimin e përvojave legjislative dhe koordinimin në fushën e politikave europiane, në kuadër të procesit të integrimit të Shqipërisë në Bashkimin Europian.
Partneriteti i ri pritet të ndihmojë në rritjen e transparencës dhe efikasitetit të Kuvendit të Shqipërisë, duke u frymëzuar nga modeli italian i funksionimit parlamentar.
Marrëveshja do të konkretizohet përmes planeve të përbashkëta të punës, vizitave të ndërsjella të delegacioneve parlamentare dhe projekteve të përbashkëta në fushën e politikave europiane.
Ky zhvillim përfaqëson një hap të rëndësishëm diplomatik dhe parlamentar, duke zgjeruar bashkëpunimin mes Shqipërisë dhe Italisë përtej nivelit qeveritar, në drejtim të forcimit të dimensionit institucional të partneritetit strategjik mes dy vendeve.
Në takim, Ballës iu bashkuan deputeti demokrat Saimir Korreshi dhe deputeti socialist Skënder Pashaj.
