Në një alabastron egjiptian jashtëzakonisht të rrallë, i cili dikur ishte në pronësi të një elite mbretërore, janë gjetur gjurmë të opiumit. Ky zbulim befasues sugjeron se narkotiku mund të jetë vlerësuar shumë dhe konsumuar gjerësisht në Egjiptin e lashtë, me mbretër dhe sundimtarë që madje zgjidhnin ta merrnin lëndën me vete në udhëtimin e tyre në jetën e përtejme.
“Ky studim paraqet provat më të qarta dhe gjithëpërfshirëse deri më tani se opiatet ishin një pjesë më e gjerë e shoqërisë së lashtë egjiptiane dhe shënon herën e parë që përmbajtja e një alabastroni egjiptian të gdhendur është identifikuar përmes teknikave shkencore,” shkruajnë autorët e një studimi të ri rreth artefaktit.
E vendosur në Koleksionin Babilonas të Muzeut Peabody të Yale-it, objekti në fjalë është një vazo alabastri e gdhendur në katër gjuhë të lashta – përfshirë Akadianishten, Elamitishten, Persishten dhe Egjiptianishten – dhe mban emrin e sundimtarit Pers të shekullit të pestë p.e.s., Kserksi I, së bashku me titullin e tij “Mbret i Madh”.
Sipas studiuesve, njihen më pak se 10 objekte të tilla të gdhendura dhe të paprekura në mbarë botën, dhe të gjitha mendohet se janë mbajtur nga sundimtarë ose elita të tjera. Duke përdorur kromatografinë e gazit me spektrometrinë e masës, autorët e studimit identifikuan noskapinë, hidrokodarninë, morfinë, tebainë dhe papaverinë brenda vazos – të gjitha këto janë biomarkues diagnostikues për opiumin.
Ky zbulim mund të zgjidhë përfundimisht debatin e gjatë në lidhje me funksionin e këtyre enëve mbretërore, të cilat disa studiues besojnë se përdoren për të ruajtur parfume ose kozmetikë. Megjithatë, bazuar në rezultatet e tyre, autorët e studimit sugjerojnë se vazot ishin në fakt çanta të lashta që përmbanin drogën e sundimtarëve të shquar.
Më parë, gjurmë opiumi ishin gjetur në një grup enësh të zbuluara në një varr në Sedment, i cili ndodhet në jug të Kajros dhe përdorej si varrezë për individë më pak të pasur. Së bashku, këto zbulime tregojnë se droga mund të jetë përdorur si nga shtresat e thjeshta, ashtu edhe nga elitat në Egjiptin e lashtë.
Kjo, nga ana tjetër, ngre disa pyetje interesante rreth përmbajtjes së enëve të tjera të lashta të alabastrit, përfshirë ato të gjetura në varrin e Tutankhamunit. Sipas autorëve të studimit, “shumë nga alabastrat e grabitura nga varri i Tutankhamunit u vëzhguan qartë se kishin të njëjtat mbetje organike ngjitëse, kafe të errët, me erë të veçantë që përputhen me karakteristikat e lëngut të thatë të opiumit.”
Studiuesit madje shkojnë aq larg sa të sugjerojnë se vazot e alabastrit të këtij lloji mund të kenë qenë sinonim i opiumit, në të njëjtën mënyrë si “nargjilet sot janë të lidhura me konsumin e duhanit të shishas”, shkruan IFL.
