Departamenti i Thesarit i Shteteve të Bashkuara njoftoi sot vendosjen e një raundi të ri sanksionesh ndaj sektorit energjetik rus, duke goditur drejtpërdrejt kompanitë më të mëdha të naftës në Rusi – Rosneft dhe Lukoil.
Në një deklaratë për shtyp, Zyra e Kontrollit të Aseteve të Huaja (OFAC) theksoi se këto masa vijnë si përgjigje ndaj “mungesës së angazhimit serioz të Moskës për t’i dhënë fund luftës në Ukrainë” dhe synojnë “të dobësojnë aftësinë e Kremlinit për të financuar makinerinë e tij të luftës”.
Sekretari i Thesarit, Scott Bessent, deklaroi se “tani është momenti për të ndalur vrasjet dhe për një armëpushim të menjëhershëm”. Ai shtoi se për shkak të “refuzimit të presidentit Vladimir Putin për t’i dhënë fund kësaj lufte të pakuptimtë”, SHBA po vendos sanksione të reja që godasin drejtpërdrejt burimet financiare të Kremlinit.
“Departamenti i Thesarit është i përgatitur të ndërmarrë hapa të tjerë nëse është e nevojshme për të mbështetur përpjekjet e Presidentit Trump për t’i dhënë fund kësaj lufte,” – theksoi Bessent, duke iu bërë thirrje aleatëve të SHBA-së të bashkohen me këtë vendim.
Cilat kompani preken
Sanksionet përfshijnë kompanitë më të mëdha të naftës dhe gazit në Rusi, përfshirë dhjetëra degë të Rosneft dhe Lukoil, që veprojnë në kërkimin, nxjerrjen, përpunimin dhe tregtimin e hidrokarbureve në territorin rus dhe jashtë tij.
Midis tyre janë:
RN Purneftegaz, RN Tuapse Oil Refinery, RN Yuganskneftegaz, Samotlorneftegaz (degë të Rosneft);
Lukoil Perm, Lukoil Kaliningradmorneft, Lukoil West Siberia Limited dhe Uraloil (degë të Lukoil).
Pasojat e sanksioneve
Me hyrjen në fuqi të vendimit, të gjitha pasuritë dhe interesat e kompanive të përfshira që ndodhen në SHBA ose janë në pronësi të personave amerikanë bllokohen menjëherë.
Gjithashtu, çdo transaksion që përfshin asetet e tyre brenda ose përmes territorit amerikan ndalohet, përveç rasteve të autorizuara posaçërisht nga OFAC.
Institucionet financiare që do të ndërmjetësojnë transaksione me subjektet e sanksionuara rrezikojnë sanksione sekondare nga Uashingtoni.
Departamenti i Thesarit theksoi se qëllimi i sanksioneve nuk është ndëshkimi, por ndryshimi i sjelljes së Rusisë dhe nxitja e një zgjidhjeje paqësore për konfliktin në Ukrainë.
