Presidenti amerikan Donald Trump deklaroi të hënën se nuk beson që Ukraina mund ta fitojë luftën kundër Rusisë, megjithëse shtoi se “çdo gjë është e mundur”, përcjell Euronews.
“Ata mund ta fitojnë ende,” tha Trump gjatë një deklarate në Shtëpinë e Bardhë.
“Nuk mendoj se do ta fitojnë. Ata mund ta fitojnë. Unë kurrë s’e kam thënë që do të fitojnë… e dini, lufta është një gjë shumë e çuditshme.”
Deklaratat e tij vijnë vetëm tri ditë pas takimit të tensionuar në Uashington me presidentin ukrainas Volodymyr Zelenskyy, ku Trump i kërkoi Kievi-t dhe Moskës të “ngrinë vijat e frontit” dhe të ndalojnë luftimet, si pjesë e një përpjekjeje për t’i dhënë fund luftës gjithëpërfshirëse të Rusisë në Ukrainë.
Në kontrast me qëndrimet e mëparshme, pas një takimi me Zelenskyy në Nju Jork muajin e kaluar, Trump kishte deklaruar se Ukraina mund t’i rimarrë të gjitha territoret e humbura që nga pushtimi i plotë rus në vitin 2022 — një qëndrim që përbënte një kthesë të fortë nga retorika e tij gjatë fushatës së vitit 2024, kur ai thoshte se Kievi do të duhej të hiqte dorë nga një pjesë e territoreve për të ndalur luftën.
Ndërkohë, Zelenskyy e përshkroi takimin e fundit si “pozitiv”, edhe pse ai nuk arriti të sigurojë raketat me rreze të gjatë Tomahawk që Ukraina kishte kërkuar prej kohësh. Sipas tij, Trump u tërhoq nga kjo ide pas një telefonate me presidentin rus Vladimir Putin, vetëm pak orë përpara takimit me të.
“Në mendimin tim, ai nuk dëshiron një përshkallëzim me rusët para se të takohet me ta,” tha Zelenskyy për gazetarët të dielën.
Presidenti ukrainas konfirmoi gjithashtu se Trump mbështet ngrirjen e konfliktit përgjatë vijës aktuale të frontit, duke e cilësuar këtë si “një mesazh pozitiv për Ukrainën”.
Trump pritet të takohet me Putinin në javët e ardhshme në Hungari, në përpjekje për të arritur një marrëveshje paqeje, pasi samiti i tyre i parë në Alaskë gjatë gushtit përfundoi pa rezultat.
Në të njëjtën kohë, sekretari amerikan i shtetit Marco Rubio zhvilloi një bisedë telefonike me ministrin e Jashtëm rus Sergey Lavrov, për të diskutuar “hapat e ardhshëm drejt përfundimit të luftës”, sipas deklaratave zyrtare të të dyja vendeve.
Sipas Uashingtonit, Rubio theksoi se takimet e ardhshme do të jenë “një mundësi për Moskën dhe Uashingtonin të bashkëpunojnë drejt një zgjidhjeje të qëndrueshme të luftës Rusi-Ukrainë”.
Ndërsa Moska e përshkroi bisedën si “konstruktive”, mbetet ende e paqartë kur dhe ku do të zhvillohet takimi i radhës mes Trump dhe Putinit.
