Kreu i KQZ-së, Ilirjan Celibashi, gjatë konferencës “30 vite partneritet dhe progres: Shqipëria, Këshilli i Evropës dhe Komisioni i Venecias”, tha se mbetet për t’u rregulluar çështja e financimit të palëve të treta që mbështesin subjekte politike gjatë fushatave zgjedhore.
“Në kuadër të organizimit dhe funksionimit të partive politike dhe financimi të fushatave zgjedhore të partive politike ngelet që të shikojmë se çfarë do të duhet të bëjmë me financimin e palëve të treta që angazhohen dhe mbështesin subjekte të caktuara politike. Duhet rregulluar ky aspekt”, tha Celibashi.
Celibashi ka evidentuar mungesa në Kodin Zgejdhor aktual sa i përket fushatës zgjedhore, duke pasur parasysh se nuk parashikohet asgjë mbi rrjetet sociale apo fushatës së organizuar online.
“Duhet të zgjidhim çështjen e votuesve që nuk mund ta ushtrojnë këtë të drejtë. Kanë të drejtën e votës por nuk mund të dalin nga banesa për arsye shëndetësore.
Kjo është e papranueshme sidomos tani kur ne ia çojmë fletën e votimit edhe shqiptarëve në Australi, ndërsa ata që e kanë shtëpinë e tyre sipër ose në krah të qendrës së votimit nuk votojnë dot se nuk dalin nga banesat për shkaqe shëndetësore”, tha ai.
