Partia Socialiste ka dorëzuar një propozim për ngritjen e një Komisioni të Posaçëm Parlamentar, i cili do të marrë në shqyrtim reformën administrativo-territoriale në Shqipëri.
Sipas vendimit të propozuar, komisioni do të fokusohet në analizimin e kuadrit ligjor dhe institucional të pushtetit vendor, strukturën territoriale ekzistuese, financat vendore, aksesin në shërbimet publike dhe përafrimin e këtyre elementeve me standardet e Bashkimit Europian dhe politikat e kohezionit rajonal.
Përbërja dhe funksionimi i Komisionit
Komisioni do të përbëhet nga 17 anëtarë, përfaqësues të të gjitha forcave parlamentare:
9 deputetë nga Partia Socialiste (PS)
6 deputetë nga Partia Demokratike (PD)
1 deputet nga Aleanca për Ndryshim
1 deputet nga Partia e Lirisë
Kryetari i Komisionit do të jetë nga shumica parlamentare, ndërsa zëvendëskryetari do të përfaqësojë opozitën.
Objektivat kryesore
Komisioni do të:
Analizojë funksionalitetin e ndarjes aktuale territoriale
Propozojë opsione për ridizenjimin e hartës administrative
Sugjerojë masa për përmirësimin financiar të njësive vendore
Sigurojë konsultime gjithëpërfshirëse me komunitetin, shoqërinë civile, akademinë dhe partnerët ndërkombëtarë
Hartojë një dokument me rekomandime dhe propozime ligjore për reformën
Komisioni do të funksionojë për një periudhë prej 9 muajsh, me mundësi zgjatjeje në rast nevoje. Ai do të mbështetet nga një grup ekspertësh vendas dhe ndërkombëtarë, si dhe do të bashkëpunojë me organizata ndërkombëtare si Bashkimi Europian, OSBE dhe Këshilli i Europës për asistencë teknike.
Në kuadër të veprimtarisë së tij, komisioni do të zhvillojë seanca dëgjimore, tryeza pune dhe konsultime publike me përfaqësues të institucioneve qendrore dhe vendore, shoqërisë civile, komuniteteve pakicë dhe organizatave ndërkombëtare.
