Autoritetet izraelite kanë deklaruar se një nga katër trupat e dorëzuar gjatë natës nga Hamasi “nuk përputhet me asnjë nga pengjet” e mbajtura në Rripin e Gazës.
Sipas marrëveshjes së armëpushimit në kuadër të planit të paqes për Gazën, Hamasi ishte i detyruar të dorëzonte të gjithë 48 pengjet e mbetura gjatë fazës së parë të marrëveshjes, deri tani janë liruar 20 pengje të gjallë dhe janë kthyer trupat e 7 pengjeve të vrarë.
Tre trupat e tjerë të dorëzuar mbrëmë janë identifikuar si Tamir Nimrodi, Eitan Levi dhe Uriel Baruch.
Në përgjigje të vonesave në dorëzimin e trupave, Izraeli ka paralajmëruar se do të kufizojë ndihmën humanitare që hyn në Gazë dhe do të shtyjë rihapjen e pikës kufitare të Rafahut.
Marrëveshja e armëpushimit, ndërmjetësuar nga SHBA, duket se e njeh faktin se Hamasi dhe fraksione të tjera palestineze mund të mos jenë në gjendje të gjejnë trupat e të gjithë pengjeve përpara afatit fillestar të së hënës.
Ndërkohë, brenda Gazës, banorët raportojnë kushte të përziera: disa thonë se furnizimet ushqimore janë përmirësuar pas armëpushimit, ndërsa të tjerë i thanë BBC-së se “nuk ka ujë, as energji elektrike, nuk është si armëpushimi i janarit.”
