Izraeli priste me ankth të hënën transferimin e trupave të disa pengjeve të vrarë në Gaza, ndërkohë që ribashkime emocionuese u shpalosën në gjithë vendin me 20 robër të liruar që u kthyen në shtëpi pas më shumë se dy vitesh në robërinë e Hamasit.
Zhvillimet erdhën vetëm disa orë para se Presidenti i SHBA-së, Donald Trump, të mbërrinte në vendpushimin egjiptian të Sharm el-Sheikh për një samit ndërkombëtar që shënon fundin formal të luftës në Gaza.
Forcat Mbrojtëse të Izraelit (IDF) dhe Shin Bet thanë se Kryqi i Kuq ishte rrugës drejt një pike takimi në Gazën jugore, ku Hamasi pritet të dorëzojë mbetjet e disa pengjeve që u vranë në robëri. Hamasi njoftoi se do kthente trupat e Yossi Sharabi, Daniel Peretz, Bepin Joshi dhe Guy Ilouz.
“IDF-ja është e përgatitur të marrë trupat që pritet t’i transferohen Kryqit të Kuq më vonë,” tha ushtria në një deklaratë, duke shtuar se familjet do njoftohen pas identifikimit zyrtar.
Megjithatë, Hamasi nuk i ka përmbushur ende kushtet e marrëveshjes së ndërmjetësuar nga SHBA-ja dhe Egjipti, e cila kërkonte kthimin e të gjitha 28 kufomave deri të hënën pasdite. Forumi i Familjeve të Pengjeve dhe të Zhdukurve e dënoi vonesën, duke e quajtur atë “shkelje flagrante e marrëveshjes.”
“Familjet janë në zi dhe dëshpërim të thellë,” tha forumi.
“Qeveria e Izraelit dhe ndërmjetësit duhet të veprojnë menjëherë për të korrigjuar këtë padrejtësi të rëndë. Hamasi duhet të mbahet përgjegjës për çdo shkelje.”
Ministri i Mbrojtjes Israel Katz gjithashtu akuzoi Hamasin për provokim të qëllimshëm.
“Çdo vonesë apo shmangie do konsiderohet një shkelje serioze e marrëveshjes dhe do ndiqet në përputhje me rrethanat,” tha ai.
Të gjithë 13 pengjet e gjallë nga grupi i dytë – Bar Kupershtein, Evyatar David, Rom Braslavski, Yosef Chaim Ohana, Segev Kalfon, Avinatan Or, Elkana Buchbut, Maksim Herkin, Nimrod Cohen, Matan Zangauker, David dhe Ariel Cunio, dhe Eitan Horn – i janë dorëzuar forcave të IDF-së dhe ndodhen në territorin izraelit.
Babai i njërit prej pengjeve shtoi: “Nuk arrija ta dëgjoja mirë, por nuk ka rëndësi. Shikimi i buzëqeshjes së tij më ktheu buzëqeshjen e dy viteve më parë. Më kishte munguar shumë. Kjo është ajo që shpresonim, ajo që prisnim, ajo që dëshironim. Sot mund të themi bekimin, ‘Shehecheyanu, v’kiyemanu, v’higianu lazman hazeh’ (Falënderojmë që na mbajtë gjallë, na mbajtë në jetë, dhe na bëtë të arrijmë në këtë kohë). Ndihet si një ëndërr.”
Julie, nëna e Bar Kupershtein, i tha Keshet Neës pasi pa djalin e saj në telefon: “Ta shoh djalin tim pas dy vitesh…çfarë djali, po vdes nga gëzimi. Ai tha, ‘Mami, gjithçka është në rregull.’ Çfarë burri.”
Ajo shtoi: “Ne ishim në kompleks, dhe papritur kishte një thirrje të humbur. Pashë që ishte nga Brigadat al-Aqsa, e thirra prapa, dhe ata u përgjigjën! Papritur, pashë Barin. Fillova të vrapoja drejt zonës së Tal-it sepse ai ishte në dhomë.”
Rom Braslavski, Yosef Chaim Ohana, Evyatar David dhe Bar Kupershtein folën me familjet e tyre në një video-thirrje.
Pengjet e kthyer – Eitan Mor, Alon Ohel, Ziv Berman, Gali Berman, Guy Gilboa-Dalal, Omri Miran dhe Matan Angrest – u shoqëruan nga personeli i IDF-së dhe Shin Bet teksa hynë në Izrael.
IDF-ja tha se është e përgatitur të marrë pengje shtesë që pritet t’i transferohen Kryqit të Kuq më vonë gjatë ditës.
Familja e Omri Miran, i cili më në fund është kthyer në Izrael, tha: “Babai Omri është në shtëpi. Pas më shumë se 700 ditësh të gjata, të dhimbshme dhe të mundimshme, Omri më në fund do marrë një përqafim nga Roni dhe Alma që do të shërojë gjithçka.”
Shtatë pengje izraelite iu dorëzuan IDF-së nga Gaza të hënën në mëngjes, duke i dhënë fund 738 ditëve të robërisë dhe duke shënuar fazën e parë të një shkëmbimi historik të të burgosurve nën armëpushimin Izrael-Hamas.
Ndërsa autokolona e parë kaloi jashtë Gazës, shpërthyen skena gëzimi në të gjithë Izraelin. Familjet e pengjeve të liruar morën konfirmim direkt nga ushtria, duke përfshirë fotografi dhe mesazhe video. “Ata janë të sigurt dhe po kthehen në shtëpi,” tha një zëdhënës i IDF-së.
Në një zhvillim të jashtëzakonshëm, disa familje pengjesh morën thirrje telefonike dhe video direkt nga Hamasi pak para lirimit. Midis tyre ishte Einav Zangauker, e cila foli me djalin e saj Matan, i cili pritet të lirohet në raundin tjetër.
“Zoti është i madh, Matan…ti po kthehesh në shtëpi. Të gjithë po ktheheni në shtëpi. Të dua,” tha Einav përmes lotëve gjatë thirrjes. Djali i saj u përgjigj, “Edhe një orë e gjysmë.”
E kapluar nga emocionet, ajo u përgjigj: “Jeta ime, faleminderit Zot që mbaroi lufta. Nuk ka luftë, ti po kthehesh në shtëpi. Dashuria ime, po të pres.”
Familjet e David dhe Ariel Cunio dhe Nimrod Cohen morën gjithashtu thirrjet e tyre të para telefonike nga të dashurit e tyre, në atë që të afërmit e përshkruan si “momente që nuk do t’i harrojmë kurrë.”
Në shtëpinë e Alon Ohel në Misgav, të afërmit shikonin me lot ndërsa lajmi konfirmoi se ai ishte ndër të parët që u lirua.
“Po presim të shohim Alonin,” tha nëna e tij, Idit Ohel, duke folur nga baza Re’im përmes videos live. Në Sheshin e Pengjeve në Tel Aviv, mijëra njerëz u mblodhën për të ndjekur transmetimet live nga Gaza, duke valëvitur flamuj izraelitë dhe duke qarë ndërsa autokolonat e Kryqit të Kuq kalonin kufirin. “Emocioni nuk mund të përshkruhet,” tha Vicky Cohen, nëna e ushtarit të liruar Nimrod Cohen.
Sipas Forumit të Familjeve të Pengjeve dhe të Zhdukurve, 20 pengje pritet të lirohen të gjallë si pjesë e shkëmbimeve të ditës. Emrat e tyre përfshijnë Evyatar David, Alon Ohel, Avinatan Or, Gali Berman, Ziv Berman, Ariel Cunio, David Cunio, Matan Angrest, Nimrod Cohen, Bar Kuperstein, Yosef Chaim Ohana, Segev Kalfon, Elkana Bohbot, Maxim Herkin, Eitan Horn, Eitan Mor, Omri Miran, Alon Ahel, Guy Gilboa-Dalal dhe Rom Braslavski.
Gjatë natës, kabineti izraelit miratoi ndryshime të minutës së fundit në listën e të burgosurve palestinezë që do liroheshin, duke zëvendësuar dy të ndaluar të listuar më parë me dy të burgosur të lidhur me Hamasin që nuk po vuanin dënime të përjetshme. Numri total i të ndaluarve nga Gaza që do të liroheshin të hënën u rregullua në 1,718.
Në të gjithë Izraelin, familjet festuan me lot, shampanjë dhe lutje. Rivka Bohbot, gruaja e Elkana Bohbot, tha se emocionet ishin “paralizuese” ndërsa përgatitej të takonte burrin e saj.
“Nuk mund të pres të shoh Elkanan tim të dashur, kurrë nuk hoqa dorë prej tij,” tha ajo.
Katy Levi, tezja e Segev Kalfon, tha se nuk kishte fjetur për tri ditë.
“Ai është heroi ynë…ai i mbijetoi më shumë se 730 ditëve,” tha ajo. “Kemi pritur dhe kurrë nuk kemi humbur shpresën…makthit i erdhi fundi.”
VINI RE: Ky material është pronësi intelektuale e Ynet
Përgatiti për Hashtag.a, Klodian Manjani
