Bashkia Tropojë ka bërë të ditur se rruga drejt Bjeshkës së Javorrit është hapur, pas një operacioni intensiv nga Drejtoria e Shërbimeve dhe punonjësit e saj, të cilët punuan në kushte të vështira atmosferike për të pastruar dëborën, që në disa zona kishte arritur trashësinë deri në 1 metër.
Për shkak të bllokimit nga dëbora, disa persona ishin izoluar në zonë, por falë ndërhyrjes së shpejtë dhe të koordinuar të ekipeve të emergjencës, ata u transportuan në mënyrë të sigurt dhe u kthyen në banesat e tyre pa probleme shëndetësore.
Në këtë operacion morën pjesë 10 punonjës të Drejtorisë së Shërbimeve dhe 1 punonjës i emergjencave civile. Për pastrimin e rrugës u angazhuan 2 mjete me zinxhirë dhe 1 fadromë e Bashkisë Tropojë.
Autoritetet lokale kanë bërë thirrje për kujdes të shtuar për shkak të motit të paqëndrueshëm dhe kanë siguruar se do të vijojnë monitorimin dhe ndërhyrjet e nevojshme në të gjitha akset rrugore të rrezikuara nga dëbora.
