Kanadaja këtë javë përditësoi këshillat e saj të udhëtimit për Shtetet e Bashkuara, duke paralajmëruar udhëtarët që kanë në pasaportë shenjën X që nënkupton gjini të paidentifikuar, se mund të mos lejohen të hyjnë në vend.
“Ndërsa Qeveria e Kanadasë lëshon pasaporta me një identifikues gjinor ‘X’, ajo nuk mund të garantojë hyrjen ose tranzitin tuaj përmes vendeve të tjera,” shkruhet në paralajmërimin e ri.
Paralajmërimi thotë se udhëtarëve mund t’u kërkohet të japin informacionin e seksit ose gjinisë si mashkull ose femër, shkruan Reuters.
Kanadaja është një nga një numër vendesh që u lejon qytetarëve të cilët nuk identifikohen as si femra as si meshkuj të listojnë gjininë e tyre me një “X” në pasaporta, në vend të një “F” për (Femër) ose “M” për (Mashkull).
Doganat dhe Policia Kufitare e SHBA-së thanë në një deklaratë me email se gjinia e udhëtarëve të huaj siç tregohet në pasaportën e tyre dhe bindjet e tyre personale për seksualitetin nuk i bëjnë ata të palejueshëm në Shtetet e Bashkuara.
Vetë Shtetet e Bashkuara kanë lëshuar gjithashtu pasaporta me një “X” sipas një politike të filluar nën administratën e Presidentit Joe Biden. Presidenti Donald Trump lëshoi një urdhër ekzekutiv në janar, duke njohur vetëm dy gjini biologjike, përfshirë në dokumentet e identifikimit të lëshuara nga qeveria.
