Të paktën një person ka vdekur ndërsa dhjetëra të tjerë kanë mbetur të bllokuar pasi një ndërtesë shkolle islamike me konvikt u shemb në provincën Java Lindore të Indonezisë , thanë zyrtarët të martën.
Mbi 100 persona, kryesisht fëmijë, janë shpëtuar nga rrënojat e shkollës Al Khoziny e cila u shemb të hënën pasdite, tha agjencia për zbutjen e fatkeqësive në një deklaratë, shkruan DW.
Nuk ishte e qartë se sa njerëz ishin ende të bllokuar nën rrënojat e ndërtesës, me raportet që varionin nga 38 deri në 65 të zhdukur.
Ndërtesa u shemb nën peshën e katit të katërt që po ndërtohej. Zgjerimi i ndërtesës nuk ishte autorizuar, sipas zëdhënësit të policisë provinciale, Jules Abraham Abast.
Dhjetëra studentë po merrnin pjesë në lutjet e pasdites kur ndërtesa u shemb.
“Ky incident i papritur bëri që materialet e ndërtimit të binin mbi dhjetëra studentë dhe punëtorë”, tha zëdhënësi Abdul Muhari.
Çfarë dimë për operacionin e shpëtimit?
Zyrtarët e shpëtimit po u siguronin oksigjen dhe ujë studentëve që ishin ende të bllokuar nën rrënoja, ndërsa punonin për të çliruar të mbijetuarit, më shumë se 12 orë pasi ndodhi aksidenti.
“Ne u kemi dhënë oksigjen dhe ujë atyre që janë ende të bllokuar nën rrënoja dhe i kemi mbajtur gjallë ndërsa punojmë shumë për t’i nxjerrë jashtë”, tha Nanang Sigit, oficeri i shpëtimit që drejton përpjekjet.
Ai tha se ekipet e shpëtimit kishin parë disa trupa nën rrënoja, por ishin të përqendruar në shpëtimin e atyre që ishin ende gjallë.
Qindra punonjës të shërbimeve të fatkeqësive natyrore, zyrtarë policie dhe ushtarë punuan gjatë gjithë natës për të nxjerrë të mbijetuarit. Ata pezulluan përkohësisht punën në orën 10:15 të mëngjesit të së martës, kur ndërtesa u drodh, duke rritur frikën se mund të shembej më tej.
Ndërsa makineritë e rënda ishin në vend për të ndihmuar përpjekjet, ato nuk po përdoreshin për shkak të kushteve të paqëndrueshme.
Çfarë dimë për studentët e zhdukur?
Imazhet nga mediat lokale treguan familjet e nxënësve të mbledhura në spitale dhe në vendin e shkollës, duke kërkuar me ankth në një tabelë të bardhë për lajme për fëmijët e tyre.
Associated Press raportoi se bordi i shkollës tregoi se 65 fëmijë ende të zhdukur deri të martën në mëngjes, shumica e të cilëve djem të moshës 12 deri në 17 vjeç.
