Presidenti i SHBA, Donald Trump, tha se është informuar mbi ngjarjet në Grand Blanc, Michigan, ku një burrë 40-vjeçar sulmoi Kishën e Jezu Krishtit të Shenjtorëve të Ditëve të Mëvonshme, duke përplasur makinën e tij në derën kryesore, dalë nga makina dhe hapur zjarr me armë automatike ndaj qindra besimtarëve.
Pas ndërhyrjes së policisë lokale, sulmuesi u neutralizua.
Zjarri i vendosur në kishë u shua nga zjarrfikësit, por autoritetet paralajmërojnë se mund të ketë viktima të tjera.
Sipas kryepolicit William Renye, ngjarja duket se përfshinte vetëm një sulmues, i cili dyshohet se vendosi qëllimisht flakët.
Ende nuk është përcaktuar motivi i sulmit.
Trump e quajti incidentin një “të shtënë të tmerrshme” dhe shtoi se “i dyshuari është i vrarë, por ende ka shumë për të mësuar”.
Ai gjithashtu e konsideroi sulmin si “një tjetër sulm i synuar ndaj kristianëve në Shtetet e Bashkuara të Amerikës”.
Presidenti njoftoi se “FBI ishte menjëherë në vendngjarje dhe do të udhëheqë hetimin federal, duke ofruar mbështetje të plotë për autoritetet shtetërore dhe lokale”, dhe përfundoi me thirrjen: “KJO EPIDEMI E DHUNËS NË VENDIN TONË DUHET TË MBAROJË, MENJËHERË!”
Ngjarja ndodhi gjatë një fundjave veçanërisht të dhunshme në SHBA, ku janë raportuar më shumë se 320 të shtena masive gjatë vitit 2025, duke përfshirë incidente të tjera në Karolinën e Veriut, Teksas dhe New Orleans, duke theksuar shqetësimin e vazhdueshëm për dhunën me armë në vend.
