Kryetari i grupit parlamentar të Partisë Demokratike, Gazment Bardhi, ka reaguar pas publikimit të raportit të Departamentit Amerikan të Shtetit (DASH) mbi klimën e investimeve në Shqipëri. Ai e cilësoi raportin si një provë të denoncimeve të opozitës për ndikimin negativ të krimit dhe korrupsionit në ekonominë e vendit gjatë qeverisjes së Edi Ramës.
Në mesazhin e tij, Bardhi thekson se raporti vë në dukje praninë e të ardhurave të paligjshme nga trafikimi i drogës, kontrabanda, evazioni fiskal dhe korrupsioni, të cilat shtrembërojnë konkurrencën në treg dhe pengojnë investimet e huaja. Ai shtoi se investitorët raportojnë se mund të jenë objekt shantazhesh nga administrata publike, media dhe grupe kriminale, faktor kyç që mban larg investimet.
Bardhi nënvizon se Ligji për Investimet Strategjike, i miratuar në vitin 2015, nuk ka arritur të tërheqë investime të huaja të konsiderueshme, dhe shumica e projekteve të miratuara përqendrohen në sektorin e turizmit dhe janë të kontrolluara nga investitorët vendas. Ai akuzon qeverinë për dështim në menaxhimin e këtij sektori, duke e lidhur këtë me praktikat korruptive dhe lidhjet e qeverisë me krimin e organizuar.
“Gjendja e përshkruar në raportin e DASH nuk ka ardhur nga hiçi. Ajo është krijuar nga Edi Rama, që nëpërmjet takimeve sekrete dhe përjashtimit të konkurrencës ka shpërndarë leje dhe licenca biznesi. Për të ndryshuar këtë situatë, duhet të largohet përgjegjësi i kësaj gjendjeje, që është Edi Rama,” shkruan Bardhi në reagimin e tij.
