Presidenti ukrainas, Volodymyr Zelensky, konfirmoi të shtunën për herë të parë se Izraeli ka furnizuar Ukrainën me një sistem mbrojtjeje ajrore Patriot, i cili tashmë është instaluar dhe operativ.
Ai shtoi se dy bateri të tjera do të mbërrijnë në vend në vjeshtë.
“Sistemi është instaluar dhe është operativ, dhe do të marrim dy bateri të tjera nga Izraeli këtë vjeshtë,” tha Zelensky, përcjell Ynet.
Deklarata e Zelensky vjen tre muaj pas një njoftimi të befasishëm nga ambasadori izraelit në Kiev, Michael Brodsky, i cili kishte bërë të ditur se Jerusalem kishte transferuar sisteme Patriot në Ukrainë.
Megjithatë, Ministria e Jashtme e Izraelit më vonë mohoi deklaratën, dhe deri në konfirmimin e Zelensky nuk kishte pasur informacione të tjera publike.
Sistemet Patriot (MIM-104), të zhvilluara nga kompania amerikane Raytheon në fund të viteve 1970, janë të dizajnuara për të interceptuar avionë dhe raketa. Ato përbëhen nga bateri raketash, radarë dhe njësitë e komandës dhe kontrollit.
Brodsky kishte sqaruar më parë se këto sisteme u kishin shërbyer Forcave të Mbrojtjes së Izraelit që nga fillimi i viteve 1990 dhe se Izraeli kishte rënë dakord t’i transferonte në Ukrainë.
Raportimet e mëparshme, përfshirë artikuj të Financial Times dhe The New York Times, kanë treguar se Shtetet e Bashkuara, Izraeli dhe Ukraina kishin diskutuar transferimin e tetë baterive Patriot të përdorura, të tipit M901 PAC-2, që mund të përmirësonin ndjeshëm mbrojtjen e Kievit kundër sulmeve ruse.
Në korrik, presidenti amerikan Donald Trump njoftoi se Uashingtoni do t’i siguronte Ukrainës “armët më të avancuara” për luftën kundër Rusisë, duke theksuar se kostot e baterive dhe raketave Patriot do të mbuloheshin nga vendet e tjera të NATO-s dhe jo nga taksapaguesit amerikanë.
