Deputeti i Lëvizjes Bashkë, Redi Muçi, kritikoi ashpër mbylljen e seancës së kaluar, e cila përfundoi brenda 25 minutash, duke e cilësuar atë si një akt autoritar dhe në shkelje të rregullores.
Ai akuzoi kryetarin e Kuvendit, Niko Peleshi, se mbylli mikrofonat e deputetëve të opozitës me urdhër të kryeministrit Edi Rama.
“Ajo që ndodhi në seancën e fundit është e paprecedentë. Mbyllja ishte në shkelje të rregullores por dhe akt i paprecedentë që zhbën parlamentarizmin në vendin tonë.
Shqipëria nuk është autokraci që në seancën më të rëndësishme ku do të debatohej programi qeverisës jo të mbyllni mikrofonat deputetëve të opozitës si të ishin në Korenë e Veriut.
Nëse një apo dy deputetë prishin seancën, rregullorja parashikon masat disiplinore. Ju Peleshi s’e keni kuptuar roli që mban ajo karrige ku jeni ulur.
Detyra juaj është të siguroni mbarëvajtje në seancë plenare dhe jo t’i bindeni urdhërave të Ramës për të mbyllur mikrofonat.”, tha Redi Muçi.
