Arabia Saudite njoftoi të shtunën se do ofrojë gati 368 milionë dollarë ndihmë ekonomike për qeverinë e Jemenit të udhëhequr nga kreu i Këshillit të Lidershipit Presidencial, Rashad al-Alimi, në një përpjekje për të lehtësuar krizën ekonomike që po thellohet në atë vend.
Ministria e Jashtme Saudite tha se sipas Programit të Zhvillimit dhe Rindërtimit të Jemenit, rreth 368 milionë dollarë do ndahen si mbështetje e re për zhvillimin ekonomik.
Ajo shpjegoi se vendimi u mor me udhëzimet e Mbretit Salman bin Abdulaziz dhe rekomandimin e Princit të Kurorës Mohammed bin Salman, duke përmendur kushtet ekonomike të përkeqësuara të Jemenit.
Ndihma i përgjigjet një thirrjeje nga Al-Alimi dhe është pjesë e mbështetjes së Arabisë Saudite për qeverinë e njohur ndërkombëtarisht të Jemenit.
Fondet do drejtohen drejt sektorëve kryesorë, duke përfshirë kujdesin shëndetësor, buxhetin qeveritar dhe furnizimet me karburant, për të ndihmuar në stabilizimin e shërbimeve kritike në vendin e shkatërruar nga lufta.
Jemeni është përfshirë në luftë për më shumë se një dhjetëvjeçar. Rebelët Houthi të mbështetur nga Irani kanë kontrolluar kryeqytetin, Sanaa, dhe pjesë të vendit që nga shtatori i vitit 2014, shkruan AA.
Një koalicion i udhëhequr nga Arabia Saudite ka mbështetur qeverinë e Jemenit kundër rebelëve Houthi që nga marsi i vitit 2015.
Lufta e zgjatur ka krijuar një nga krizat më të këqija humanitare në botë.
OKB vlerëson se më shumë se 22 milionë nga 30 milionë banorët e Jemenit kanë nevojë për ndihmë dhe mbrojtje humanitare.
Mungesa e përhapur e ujit të pastër, ushqimit, ilaçeve dhe furnizimeve mjekësore ka nxitur shpërthime të kolerës dhe sëmundjeve të tjera infektive, duke përkeqësuar vuajtjet e civilëve.
