Estonia thirri një diplomat rus për të protestuar pasi tre avionë luftarakë rusë hynë në hapësirën e saj ajrore pa leje të premten dhe qëndruan atje për 12 minuta, tha Ministria e Jashtme. Kjo ndodhi pak më shumë se një javë pasi aeroplanët e NATO-s rrëzuan dronë rusë mbi Poloni dhe rritën frikën se lufta në Ukrainë mund të përhapej, shkruan AP .
Ministri i Jashtëm Margus Tsahkna tha se Rusia shkeli hapësirën ajrore estoneze katër herë këtë vit, “por inkursioni i sotëm, që përfshinte tre avionë luftarakë që hynë në hapësirën tonë ajrore, është i paprecedentë”.
Ministri estonez i Mbrojtjes, Hanno Pevkur, tha gjithashtu se qeveria kishte vendosur “të fillonte konsultimet midis aleatëve”. sipas nenit 4 të NATO-s, shkroi ai në X, pasi avionët rusë “shkelën përsëri hapësirën tonë ajrore”.
Këshilli i Atlantikut të Veriut, organi kryesor vendimmarrës politik i NATO-s, do të mblidhet në fillim të javës së ardhshme për të diskutuar incidentin në më shumë detaje, tha të premten zëdhënësja e NATO-s, Allison Hart.
Neni 4, më i shkurtri nga 14 nenet e traktatit të NATO-s, thotë se: “Palët do të konsultohen së bashku sa herë që, sipas mendimit të ndonjërës prej tyre, integriteti territorial, pavarësia politike ose siguria e ndonjërës prej Palëve kërcënohet.”
