Komisionerët e Bashkimit Evropian pritet të diskutojnë të mërkurën sanksionet e reja kundër Izraelit për shkak të luftës në Gaza, duke përfshirë propozimet për pezullimin e disa dispozitave në marrëveshjet tregtare dhe për kufizimin e disa ministrave të kabinetit izraelit.
Diskutimi vjen pas një deklarate nga Presidentja e Komisionit Evropian Ursula von der Leyen. Sipas zëdhënëses së komisionit Paula Pinho, komisionerët do t’ua paraqesin propozimet e lidhura me tregtinë krerëve të shteteve të BE-së nëse ato miratohen. Megjithatë, masat do kërkojnë ende miratimin nga Këshilli i BE-së, i cili duhet t’i miratojë ato me shumicë të kualifikuar. Diplomatët thonë se një shumicë e tillë aktualisht nuk ekziston, me Gjermaninë dhe Italinë që janë kundër, shkruan Ynet.
Komisioni do shqyrtojë gjithashtu sanksionimin e ministrave të djathtë izraelitë, një ide që dështoi në të kaluarën, por kohët e fundit ka fituar terren. Holanda ka vendosur tashmë sanksione ndaj ministrit të Sigurisë Kombëtare Itamar Ben-Gvir dhe ministrit të Financave Bezalel Smotrich, duke zbatuar një marrëveshje Shengen që zbatohet në 29 vende.
Njoftimi përkoi me një raport nga një Komision Hetimor i OKB-së që arriti në përfundimin se Izraeli ka kryer gjenocid në Gaza dhe se zyrtarë të lartë izraelitë, përfshirë kryeministrin Benjamin Netanyahu, kishin nxitur akte të tilla. Izraeli i hodhi poshtë gjetjet si “skandaloze” dhe “të rreme”.
“Gjenocidi po ndodh në Gaza”, tha Navi Pillay, një ish-gjyqtare e Gjykatës Ndërkombëtare Penale që kryeson hetimin. Ajo tha se udhëheqësit izraelitë kishin orkestruar një fushatë me qëllim shkatërrimin e popullsisë palestineze në Gaza.
Analiza ligjore prej 72 faqesh përmendi vrasjet në shkallë të gjerë, bllokimet e ndihmës, zhvendosjen me forcë dhe shkatërrimin e një klinike fertiliteti si prova, dhe arriti në përfundimin se Izraeli kreu katër nga pesë aktet që përbëjnë gjenocid sipas Konventës së OKB-së për Gjenocidin e vitit 1948. Këto përfshijnë vrasjen, shkaktimin e dëmeve të rënda trupore ose mendore, shkaktimin e kushteve shkatërruese të jetës dhe vendosjen e masave për të parandaluar lindjet.
Ambasadori i Izraelit në OKB në Gjenevë, Daniel Meron, tha se raporti është shkruar nga “të dërguarit e Hamasit” dhe akuzoi komisionin se vepron me një axhendë politike. Izraeli ka kundërshtuar të bashkëpunojë me hetimin, i cili vepron në mënyrë të pavarur dhe nuk flet zyrtarisht në emër të Kombeve të Bashkuara.
