Dhëndri i ish-kryeministrit Sali Berisha, Jamarbër Malltezi, e ka cilësuar proces politik gjyqin ndaj tij në Gjykatën e Posaçme, i nisur sot për aferën “Partizani”.
Në një prononcim për gazetarët pas seancës, Malltezi deklaroi se dokumenti i akt-akuzës përmban falsifikime dhe se prej tre vitesh emrat e personave të hetuar janë mbajtur të fshehtë.
“Është një proces politik siç u dëshmua. Kemi identifikuar me dhjetëra falsifikime të dokumentit zyrtar akt-akuzë. Ka 3 vite që u mbajt e fshehtë, u fshehën emrat e personave ndaj të cilëve zhvilloheshin hetime,” u shpreh Malltezi.
Ai akuzoi gjyqtaren e GJKKO, Irena Gjoka, duke pretenduar se ajo ka qenë e dënuar në Greqi dhe se mbrohet nga kryeministri Edi Rama për të përdorur, sipas tij, si “kamikaze politike” kundër opozitës.
“U përmend edhe fakti që Irena Gjoka mbrohet me një kokëfortësi të çuditshme nga Edi Rama sepse është përdorur si kamikaze për të luftuar opozitën. Vendimi i dënimit të Irenës nuk ka dënime dhe prapë KLGJ nuk vepron, Prokuroria e Përgjithshme fshihet pas gishtit. E gjithë kjo çështje nuk ka hetim, kanë hedhur në erë gjithë hetimin,” tha më tej Malltezi.
