Administrata Trump do kërkojë të kufizojë ndjeshëm të drejtën për azil në OKB më vonë këtë muaj, tregojnë dokumentet, ndërsa kërkon të zhbëjë kuadrin e pas Luftës së Dytë Botërore rreth mbrojtjes humanitare.
Zyrtarët e Departamentit të Shtetit skicuan planet për një takim më vonë këtë muaj në margjinat e takimit vjetor të Asamblesë së Përgjithshme të OKB-së, që do bënte thirrje për riformulimin e qasjes globale ndaj azilit dhe emigracionit për të pasqyruar qëndrimin kufizues të Trump, sipas dy dokumenteve të planifikimit të brendshëm të shqyrtuara nga Reuters dhe një zëdhënës i Departamentit të Shtetit, shkruan Reuters.
Sipas kuadrit të propozuar, azilkërkuesit do duhet të kërkojnë mbrojtje në vendin e parë ku hyjnë, jo në një komb të zgjedhur prej tyre, tha zëdhënësi. Azili do jetë i përkohshëm dhe vendi pritës do vendosë nëse kushtet në vendin e tyre të origjinës janë përmirësuar mjaftueshëm për t’u kthyer, një ndryshim i madh nga mënyra se si funksionon azili në SHBA dhe gjetkë.
Një nga dokumentet e përshkruan emigrimin si “një sfidë përcaktuese për botën në shekullin e 21-të” dhe thotë se azili “abuzohet rregullisht për të mundësuar emigrimin ekonomik”. Ai bën thirrje për reformimin e qasjes globale ndaj emigrimit në mbarë botën dhe kufizimin e madh të aftësisë së njerëzve për të kërkuar azil.
Në një seancë dëgjimore konfirmimi në Senat të enjten, Andreë Veprek, kandidati i Trump për të drejtuar divizionin e refugjatëve në Departamentin e Shtetit, bëri thirrje për riformësimin e qasjes globale ndaj azilit.
“Ndoshta shkaku më i rëndësishëm rrënjësor I emigrimit masiv dhe të paligjshëm sot është abuzimi i sistemeve të refugjatëve dhe azilit”, tha Veprek.
“Korniza e tanishme e marrëveshjeve dhe normave ndërkombëtare mbi emigracionin u zhvillua pas Luftës së Dytë Botërore në një kontekst krejtësisht të ndryshëm gjeopolitik dhe ekonomik. Nuk mund të pritet që ajo të funksionojë në botën tonë moderne, dhe në fakt nuk funksionon.”
