Policia Metropolitane tha se rreth 110 mijë persona morën pjesë të shtunën në marshimin e së djathtës ekstreme në Londër me moton “Unite the Kingdom”, duke e cilësuar ngjarjen si një nga tubimet më të mëdha të këtij lloji në dekada.
Në të njëjtën kohë, rreth 5 mijë persona morën pjesë në marshimin kundër-racist Stand Up to Racism.
“Është e vështirë të vlerësohen shifrat në protesta masive, por ne përdorim kombinimin e pamjeve nga CCTV dhe helikopterët policorë për të bërë një vlerësim,” tha një zëdhënës i Met Police për The Guardian.
Në Whitehall u raportuan sulme ndaj oficerëve të policisë, ku një grup nga turma e marshimit të së djathtës ekstreme hodhi objekte dhe fishekzjarre drejt forcave të rendit dhe ku u përplasën edhe me antifashistët.
Në Trafalgar Square, policia përdori kuaj për të shpërndarë mbështetësit e marshimit, ndërsa nga ana tjetër e barrikadave antifashistët brohorisnin kundër tyre.
Një person i plagosur në kokë u dërgua me urgjencë nga mjekët e policisë përmes turmës së protestuesve, të cilët e shoqëruan me thirrje “nazi scum”.
Ndërkohë, në anën tjetër të Whitehall, ku ishin bllokuar kundër-protestuesit antifashistë, atmosfera ishte krejt tjetër.
Pavarësisht tensioneve, dhjetëra prej tyre shpërthyen në një “festë vallëzimi” spontan, duke kërcyer nën muzikën e Daft Punk Lose Yourself to Dance.
Organizatorët e së djathtës ekstreme pretenduan për një pjesëmarrje edhe më të madhe se vlerësimi i policisë, por autoritetet theksuan se shifrat mes policisë dhe organizatorëve shpesh ndryshojnë ndjeshëm.
