Abu Dabi ka shumë nga gjërat që surfistët kërkojnë në gjuetinë e tyre për valë perfekte: mot të ngrohtë, diell gjatë gjithë vitit dhe ujë të pastër. E vetmja gjë që nuk kishte ishin valët.
Kjo ndryshoi në tetor 2024, kur u hap Surf Abu Dabi. Duke ofruar valën më të lartë artificiale në botë, kompania shpreson ta shndërrojë Abu Dabin në një destinacion global për surf.
Pishina me valë është 690 metra e gjatë dhe mund të qëndroni mbi një valë deri në një minutë. Të gjitha pishinat e tjera me valë janë me ujë të ëmbël, por Surf Abu Dabi është i mbushur me 80 milionë litra ujë deti të pompuar nga Gjiri Arabik. Uji është më i kripur se në shumicën e pjesëve të tjera të botës, kështu që Surf Abu Dabi ia heq pak kripën.
Vala prodhohet nga një krah nënujor i zvarritur poshtë pishinës nga rrotulla. Krahu lëviz ujin dhe dyshemeja e formuar me kujdes e pishinës, e njohur si batimetri, bën që vala të thyhet, shkruan CNN.
Teknologjia u zbulua për herë të parë në vitin 2015 në Surf Ranch në Kaliforni, dhe Liga Botërore e Surf-it (WSL), gara më e rëndësishme profesionale e surf-it, caktoi një ndalesë në pishinën Surf Ranch për sezonin 2018. WSL mbajti një garë në pishinën e Abu Dabit në shkurt 2025. Në vitin 2016, WSL Holdings, kompania mëmë e Ligës Botërore të Surf-it, bleu kompaninë Kelly Slater Ëave, e cila zotëron teknologjinë.
