Presidenti amerikan, Donald Trump, u ka bërë thirrje liderëve evropianë që të ndalojnë blerjen e naftës nga Rusia, pasi sipas tij kjo ndihmon financiarisht Moskën në luftën në Ukrainë. Lajmi u bë i ditur nga një zyrtar i Shtëpisë së Bardhë për YNetNews.
Pas bisedimeve me Trump dhe disa nga liderët kryesorë evropianë, presidenti francez Emmanuel Macron deklaroi se Franca do të vendosë sanksione ndaj Rusisë në koordinim të ngushtë me Shtetet e Bashkuara të Amerikës.
“Uashingtoni është i interesuar të marrë pjesë në garantimin e sigurisë për Ukrainën”, shtoi Macron.
Që nga fillimi i agresionit rus ndaj Ukrainës në shkurt të vitit 2022, marrëdhëniet mes Perëndimit dhe Moskës janë përkeqësuar ndjeshëm. Shtetet e Bashkuara dhe Bashkimi Evropian kanë vendosur një sërë sanksionesh ekonomike ndaj Rusisë, duke synuar të kufizojnë aftësinë e saj për të financuar luftën.
Megjithatë, blerjet evropiane të energjisë ruse, veçanërisht të naftës dhe gazit, kanë mbetur një pikë e debatueshme, pasi disa vende varen ende nga furnizimet ruse. Në këtë kontekst, thirrja e Trump për ndalimin e importeve të naftës nga Rusia dhe angazhimi i Francës për të koordinuar sanksionet me SHBA-në vjen si një përpjekje për të forcuar presionin ndërkombëtar ndaj Kremlinit.
