Presidenti Donald Trump e justifikoi të mërkurën sulmin vdekjeprurës ushtarak që administrata e tij tha se u krye një ditë më parë kundër një bande venezueliane si një përpjekje të nevojshme nga Shtetet e Bashkuara për t’u dërguar një mesazh të qartë karteleve të Amerikës Latine.
I pyetur pse ushtria nuk e ndaloi anijen dhe nuk i kapi ata që ishin në bord, Trump tha se operacioni do t’i bënte kontrabandistët e drogës të mendoheshin dy herë para se të përpiqeshin të transportonin drogë në SHBA, shkruan AP.
“Sasi të mëdha droge po hynin në vendin tonë për të vrarë shumë njerëz dhe të gjithë e kuptojnë plotësisht këtë”, tha Trump ndërsa priti Presidentin polak Karol Nawrocki në Shtëpinë e Bardhë. Ai shtoi: “Padyshim, ata nuk do ta bëjnë përsëri. Dhe mendoj se shumë njerëz të tjerë nuk do ta bëjnë përsëri. Kur ta shohin atë video, do të thonë: ‘Le të mos e bëjmë këtë’.”
Sulmi i së martës ishte një ndryshim i habitshëm nga përpjekjet tipike të SHBA-së për ndalimin e drogës në një kohë kur Trump ka urdhëruar një grumbullim të madh trupash të Marinës në ujërat pranë Venezuelës.
Më vonë të mërkurën, Sekretari i Shtetit Marco Rubio paralajmëroi se operacione të tilla “do të ndodhin përsëri”.
Rubio tha se përpjekjet e mëparshme të SHBA-së për ndalimin e drogës në Amerikën Latine nuk kanë funksionuar në ndalimin e rrjedhës së drogës së paligjshme në Shtetet e Bashkuara dhe më gjerë.
“Ajo që do t’i ndalojë është kur t’i hedhësh në erë, kur të shpëtosh prej tyre”, tha Rubio gjatë një vizite në Meksikë.
