Hamasi ka rifilluar rindërtimin e tuneleve dhe infrastrukturës tjetër nëntokësore në Gaza, duke përfshirë zonat ku forcat izraelite vepronin më parë, sipas inteligjencës së marrë nga Forcat e Mbrojtjes të Izraelit.
Zyrtarët ushtarakë vlerësojnë se Qyteti i Gazës ende përmban sisteme nëntokësore të mëdha dhe strategjikisht të rëndësishme, të cilat nuk u ekspozuan gjatë manovrës së parë tokësore atje një vit e gjysmë më parë, dhe se lufta nëntokësore do paraqesë një sfidë edhe më të madhe nëse trupat rihyjnë në qytet.
Në këtë sfond, pritet që kabineti i sigurisë të enjten të miratojë fazën tjetër të luftës, të koduar “Qerret e Gideonit 2”. Të dielën, mes demonstratave mbarëkombëtare që kërkonin lirimin e pengjeve, Shefi i Shtabit të IDF-së, Gjenerallejtënant Eyal Zamir njoftoi se faza e re do fillonte së shpejti, duke përqendruar luftimet në qytetin e Gazës.
“Ne do vijojmë të sulmojmë derisa Hamasi të mposhtet, me pengjet në qendër të vëmendjes sonë”, tha Zamir.
“Ne do veprojmë me një strategji të sofistikuar, të matur dhe të përgjegjshme. IDF do vendosë të gjitha kapacitetet e saj – në tokë, në ajër dhe në det – për të goditur Hamasin me forcë.”
