Administrata Trump ka vendosur sanksione kundër katër anëtarëve të tjerë të Gjykatës Ndërkombëtare të Hagës për shkak të përpjekjeve të tyre për të ndjekur penalisht zyrtarët izraelitë dhe amerikanë.
SHBA-të sanksionuan gjyqtarin Nicolas Yann Guillou të Francës pasi vitin e shkuar firmosi urdhërarreste për kryeministrin Benjamin Netanyahu dhe ish-ministrin e mbrojtjes Yoav Gallant për krime lufte të dyshuara të kryera në Gaza, së bashku me zëvendësprokurorin Nazhat Shameem Khan të Fixhit dhe zëvendësprokurorin Mame Mandiaye Niang të Senegalit për mbajtjen në fuqi të këtyre urdhërarresteve.
Gjyqtarja Kimberly Prost e Kanadasë është sanksionuar gjithashtu për një vendim që autorizon hetimin e Gjykatës së Hagës mbi personelin amerikan në Afganistan.
Katër zyrtarët e Hagës GJND-së i bashkohen katër të tjerëve që u sanksionuan nga administrata Trump në qershor, dy prej të cilëve ishin gjithashtu të përfshirë në urdhërarreste kundër Netanyahut dhe Gallant.
Sanksionet e sotme ngrijnë asetet amerikane të zyrtarëve të caktuar dhe bllokojnë hyrjen e tyre në vend, shkruan Times of Israel.
Izraeli dhe SHBA-të i shohin përpjekjet e Gjykatës së Hagës për të ndjekur penalisht zyrtarët izraelitë si të paligjshme, pasi vendi nuk është nënshkrues i Statutit të Romës që krijoi gjykatën dhe sepse SHBA-të nuk e njohin Autoritetin Palestinez si një shtet sovran me të drejtën për të kërkuar një veprim të tillë.
Izraeli gjithashtu mohon akuzat e ngritura kundër Netanyahut dhe Gallant.
“Shtetet e Bashkuara kanë qenë të qarta dhe të palëkundura në kundërshtimin tonë ndaj politizimit, abuzimit të pushtetit, shpërfilljes së sovranitetit tonë kombëtar dhe tejkalimit të paligjshëm gjyqësor nga Gjykata Ndërkombëtare e Hagës”, thotë Sekretari i Shtetit i SHBA-së, Marco Rubio, në një deklaratë që njofton grupin e fundit të sanksioneve.
“Gjykata është një kërcënim për sigurinë kombëtare që ka qenë një instrument për zbatimin e ligjit kundër Shteteve të Bashkuara dhe aleatit tonë të ngushtë, Izraelit”, shton ai.
“Mbetet politika e qeverisë së Shteteve të Bashkuara të ndërmarrë çfarëdo veprimi që e konsiderojmë të nevojshëm për të mbrojtur trupat tona, sovranitetin tonë dhe aleatët tanë nga veprimet e paligjshme dhe të pabaza të Gjykatës Ndërkombëtare të Hagës”, vazhdon Rubio.
“Unë i bëj thirrje vendeve që ende e mbështesin Gjykatën e Hagës, shumë prej lirive të të cilave u blenë me çmimin e sakrificave të mëdha amerikane, t’i rezistojnë pretendimeve të këtij institucioni të falimentuar.”
