Krahas një rritjeje të madhe të fuqisë së saj ushtarake konvencionale, Kina ka nisur një zgjerim të shpejtë dhe të qëndrueshëm të arsenalit të saj bërthamor, sipas ushtrisë amerikane dhe ekspertëve të kontrollit të armëve.
Komandanti i Komandës Strategjike të SHBA-së, gjenerali Anthony Cotton, i tha Kongresit në mars se urdhri i udhëheqësit kinez Xi Jinping që ushtria të jetë e gatshme të marrë Tajvanin deri më 2027 po nxit një rritje të armëve bërthamore që mund të lëshohen nga toka, ajri dhe deti, përcjell Reuters.
Në politikën e saj të mbrojtjes kombëtare të vitit 2023, Kina përsëriti zotimin e saj të kahershëm se nuk do të përdorë e para armë bërthamore në asnjë rrethanë.
Politika e ashtuquajtur “no first use” (mos përdorim i pari) përfshin gjithashtu premtimin se Kina nuk do të përdorë dhe as nuk do të kërcënojë me përdorim të armëve bërthamore një shtet që nuk ka armë të tilla.
Në një reagim për pyetjet e ngritura, ministria e mbrojtjes në Pekin deklaroi: “Një luftë bërthamore nuk mund të fitohet dhe nuk duhet të zhvillohet. Kina ndjek një strategji bërthamore mbrojtëse dhe zbaton politikën e mos përdorimit të parë.”
Megjithatë, në raportin e saj vjetor për fuqinë ushtarake kineze, Pentagoni thekson se pavarësisht deklaratave publike, strategjia e Kinës ka të ngjarë të përfshijë edhe një përdorim të parë në rast të sulmeve konvencionale që mund të rrezikojnë forcat e saj bërthamore, komandën dhe kontrollin, ose që afrohen me efektet e një goditjeje bërthamore.
Sipas Pentagonit, Pekini mund të konsiderojë gjithashtu përdorimin e parë të armëve bërthamore nëse një disfatë ushtarake konvencionale në Tajvan do të kërcënonte seriozisht mbijetesën e regjimit komunist.
Ministria e mbrojtjes e Kinës ka kundërshtuar këto vlerësime duke thënë se është kundër “çdo përpjekjeje për të fryrë rrezikun e ashtuquajtur ‘kërcënim bërthamor kinez’ me qëllim njollosjen e Kinës dhe mashtrimin e qëllimshëm të komunitetit ndërkombëtar.”
Sipas Bulletin of the Atomic Scientists, një organizatë jofitimprurëse me bazë në Çikago, Kina po zgjeron dhe modernizon arsenalin e saj më shpejt se çdo fuqi tjetër bërthamore dhe aktualisht ka rreth 600 koka luftarake.
Organizata vlerëson se Pekini po ndërton rreth 350 silo të reja për raketa dhe disa baza të reja për lëshuesit mobilë rrugorë.
Më tej, vlerësohet se Ushtria Çlirimtare Popullore (PLA) ka rreth 712 lëshues tokësorë për raketa, por jo të gjithë janë të destinuar për armë bërthamore.
Nga këta, 462 mund të ngarkohen me raketa “që mund të godasin territorin kontinental të Shteteve të Bashkuara.”
Një pjesë e madhe e lëshuesve të PLA-së janë të destinuar për raketa me rreze më të shkurtër, të planifikuara për objektiva rajonale, megjithëse shumica e tyre nuk janë të lidhura me armë bërthamore.
Sipas Pentagonit, deri në vitin 2030, Kina pritet të ketë mbi 1,000 koka luftarake bërthamore operative, duke ndërtuar një forcë më të gjerë që përfshin raketa precize me ngarkesë të ulët deri te raketat ndërkontinentale me fuqi shpërthyese shumë-multimegatonëshe.
