Protestat kundër hoteleve të emigrantëve vijojnë në gjithë Anglinë, ndërsa britanikët vendas janë të zemëruar me qeverinë që po i vë gratë dhe fëmijët vendas në rrezik duke vendosur në mes tyre azilkërkues të rinj meshkuj të paverifikuar.
Disa qytete në Angli panë vendasit të dilnin përsëri në rrugë gjatë fundjavës, në një vijim të lëvizjes protestuese që u ndez në qershor në qytetin Epping në Essex pasi një emigrant nga Etiopia, Hadush Gerberslasie Kebatu, u akuzua për sulm seksual ndaj një vajze 14-vjeçare vetëm disa ditë pasi mbërriti në mënyrë të paligjshme në Britani me anije përmes Kanalit Anglez, shkruan Breitbart.
Qindra njerëz u mblodhën jashtë “Hotel Bell” të dielën, i cili u përdor për të strehuar emigrantin etiopian, ndër të tjerë. Hoteli përballet me një sfidë ligjore në Gjykatën e Lartë nga zyrtarët vendas, të cilët argumentojnë se duhet të mbyllet si akomodim për emigrantët sepse është bërë “një vend që ushqen trazira”. Policia e Essex tha se protesta u mbajt në mënyrë paqësore dhe nuk çoi në asnjë arrestim.
Protestuesve në Epping iu bashkua udhëheqësi de facto i Partisë Konservatore, Robert Jenrick, i cili ka udhëhequr një fushatë të fuqishme muajt e fundit për të portretizuar partinë sikur i është përshtatur mënyrës së të menduarit të publikut për kontrollin e kufijve, pas 14 vitesh katastrofike në pushtet.
Megjithatë, figura nga Reform UK e Nigel Farage vunë re shpejt se ishte partia e Jenrick ajo që filloi e para të përdorte hotelet në masë për të strehuar emigrantët e paligjshëm që vinin përmes Kanalit, dhe e cila gjithashtu zbatoi liberalizimin e emigracionit pas Brexit që çoi në një numër rekord të emigrantëve të ligjshëm që iu imponuan vendit, pavarësisht se më parë kishte premtuar të bënte të kundërtën.
Në fakt, vetë Jenrick dikur ishte ministër i Emigracionit dhe mburrej me krijimin e hoteleve për emigrantë, duke çuar në pyetje se sa i sinqertë është ndryshimi i qëndrimit të Partisë Konservatore.
