Perplexity AI ka bërë një ofertë prej 34.5 miliardë dollarësh për të blerë shfletuesin Chrome nga Google, një lëvizje që përbën sfidën më të pazakontë dhe më të madhe deri më sot ndaj një prej aseteve më strategjike të gjigantit të teknologjisë. Kjo ofertë, e para e këtij lloji ndaj një produkti kyç të Alphabet, vjen në një moment kur kompania po përballet me presione të shumta rregullatore për shkak të dominimit të saj në tregun e kërkimit dhe shpërndarjes së përmbajtjes online, përcjell YNetNews.
Sipas analistëve, Chrome vlerësohet mes 34.5 deri në 50 miliardë dollarë. Me mbi 2 miliardë përdorues aktivë në mbarë botën dhe i integruar në Chromebook, shfletuesi është porta kryesore drejt shërbimeve të Google, nga Gmail dhe Drive te YouTube dhe kërkimi. Edhe pse vetë Chrome nuk gjeneron të ardhura të drejtpërdrejta të mëdha, ai është thelbësor për ekosistemin e Google, duke i siguruar kompanisë kontroll mbi shpërndarjen dhe konsumimin e përmbajtjes digjitale.
Oferta e Perplexity AI shihet si një tentativë për të shfrytëzuar një platformë masive shfletimi për integrimin e produkteve të inteligjencës artificiale. Nëse një blerje e tillë do të ndodhte, ajo mund të transformonte mënyrën se si përdoruesit ndërveprojnë me internetin, duke shtuar opsione të reja por edhe duke rrezikuar fragmentimin e standardeve të uebit dhe reduktimin e integrimit me shërbimet e Google.
Megjithatë, një marrëveshje e tillë është e vështirë të realizohet. Google pritet ta refuzojë publikisht ofertën ose ta injorojë si jokredibël, duke marrë parasysh rëndësinë strategjike të Chrome. Për më tepër, çdo shqyrtim i një shitjeje të mundshme do të duhej të kalonte përmes filtrave të rreptë antitrust në SHBA dhe BE, një proces që do të zgjaste me vite. Ekspertët theksojnë se, edhe në rast miratimi, menaxhimi i Chrome kërkon burime kolosale inxhinierike dhe infrastrukturore që një startup si Perplexity mund ta ketë të vështirë t’i përballojë.
Ky zhvillim vjen teksa Google, nën drejtimin e CEO-s Sundar Pichai, ka arritur një vlerë tregu prej 2.5 trilionë dollarësh. Humbja e Chrome do të përbënte një goditje strategjike për kompaninë, e cila prej më shumë se një dekade e gjysmë e ka përdorur shfletuesin si bazë për ruajtjen e dominimit në hapësirën digjitale. Për momentin, mbetet për t’u parë se si do të reagojë Google dhe nëse kjo ofertë do të mbetet vetëm një provokim simbolik apo do të hapë rrugën për një betejë të re mbi të ardhmen e internetit.
