Përpara bisedimeve të shumëpritura me presidentin Donald Trump në Alaska, Vladimir Putin ka sugjeruar se mund të jetë gati të arrijë një marrëveshje bërthamore me SHBA-në.
Të enjten, Putin vlerësoi SHBA-në për “përpjekjet e sinqerta” që ka bërë për t’i dhënë fund luftës midis Rusisë dhe Ukrainës, e cila ka vijuar për më shumë se tre vjet. Ai tha në televizion se SHBA-të “po bëjnë, sipas mendimit tim, përpjekje mjaft energjike dhe të sinqerta për të ndaluar armiqësitë, për të ndaluar krizën dhe për të arritur marrëveshje që janë me interes për të gjitha palët e përfshira në këtë konflikt”, sipas Reuters.
Udhëheqësi rus thuhet se përmendi gjithashtu “marrëveshje të mundshme në të ardhmen në fushën e kontrollit mbi armët sulmuese strategjike”.
Rusia dhe SHBA-të kanë arsenalet më të mëdha të armëve bërthamore në botë dhe kanë një traktat që kufizon numrin e armëve që mund të posedojnë, i cili do të skadojë në shkurt, duke shtuar më shumë presion në bisedimet e ardhshme. Traktati i Ri për Reduktimin e Armëve Strategjike (START) mbulon armët bërthamore strategjike dhe kufizon numrin e kokave bërthamore të vendosura në 1,550 në secilën palë, sipas Reuters.
Ka pasur tashmë disa tensione bërthamore midis dy kombeve në ditët e fundit, pasi Trump urdhëroi dy nëndetëse bërthamore të lëviznin më pranë Rusisë pasi ish-presidenti i vendit bëri “deklarata shumë provokuese”. Kremlini e minimizoi këtë veprim, por i paralajmëroi të gjitha palët të jenë “shumë, shumë të kujdesshme” në lidhje me retorikën bërthamore, sipas Reuters.
Takimi i së premtes në Anchorage, do jetë samiti i parë SHBA-Rusi që nga qershori 2021, vetëm tetë muaj para pushtimit të Ukrainës nga Putini. Ky takim shënon një moment vendimtar për Trumpin, i cili ka bërë presion për t’i dhënë fund luftës, shkruan Fox.
Trump ka kërcënuar me “pasoja shumë të rënda” nëse Putini nuk pranon paqe me Ukrainën, por nuk ka dhënë detaje se çfarë mund të nënkuptojë kjo.
Presidenti ukrainas Volodymyr Zelenskyy, marrëdhënia e të cilit me Trumpin ka qenë e trazuar, hodhi dyshime mbi gatishmërinë e Rusisë për t’i dhënë fund luftës. Të mërkurën, ai shkroi në X se nuk pa “asnjë shenjë se rusët po përgatiten t’i japin fund luftës”.
