Të paktën 22 migrantë kanë vdekur, ndërsa afër 60 të tjerë janë shpëtuar, pasi dy anije u fundosën në Mesdhe të mërkurën. Shumë të tjerë konsiderohen të zhdukur, përcjell REL.
Sipas Kryqit të Kuq, 56 burra dhe katër gra mbijetuan fundosjes, ndërsa është ende e paqartë numri i saktë i personave që ndodheshin në anijet që u nisën nga Zavija dhe Tripoli në Libi. Disa të mbijetuar treguan se një nga anijet filloi të përmbytej, duke shtyrë migrantët drejt anijes tjetër, e cila u mbingarkua dhe u mbush me ujë.
Mes viktimave të transportuara në morgun e Lampedusës janë një i sapolindur, tre fëmijë, dy burra dhe dy gra. UNHCR-ja njoftoi se këtë vit janë regjistruar tashmë 675 viktima në tentativat e kalimit të Mesdheut nga migrantët, ndërsa 38.263 persona kanë mbërritur deri tani në brigjet e Italisë.
Ministri i Brendshëm italian, Matteo Piantedosi, tha se tragjedia thekson “urgjencën për të parandaluar udhëtimet e rrezikshme detare” dhe njoftoi se qeveria po bashkëpunon me vendet e Afrikës së Veriut për të ndalur nisjen e migrantëve drejt Italisë.
