Tre persona kanë mbetur të plagosur në një të shtënë me armë zjarri në Times Square të New Yorkut, pasi një 17-vjeçar hapi zjarr, njofton Policia e New Yorkut (NYPD) për Guardian.
Ngjarja ndodhi në orën 1:20 të mëngjesit të së shtunës në rrugën West 44th dhe Avenuen 7-të. Policia po interviston një person që është ndaluar, por deri tani nuk janë ngritur akuza.
Të plagosurit janë një 18-vjeçare, e cila u lëndua në qafë, një 19-vjeçar me një plumb në këmbën e djathtë dhe një 65-vjeçar me plumb në këmbën e majtë. Të tre u dërguan në spitalin Bellevue dhe ndodhen në gjendje stabile.
Sipas policisë, para të shtënave pati një mosmarrëveshje verbale mes të riut dhe njërit prej të plagosurve. Arma u sekuestrua nga autoritetet.
Ngjarja ndodh në një kohë kur krimi me armë në qytetin e New Yorkut ka pësuar një ulje të ndjeshme. Në shtatë muajt e parë të vitit 2025 janë regjistruar 412 raste të të shtënave, niveli më i ulët që nga nisja e regjistrimeve zyrtare, sipas komisares së policisë Jessica S. Tisch. Kjo shënon një rënie prej 23% krahasuar me të njëjtën periudhë të vitit të kaluar.
