Kërkues japonezë kanë vendosur një rekord të ri botëror për shpejtësinë e internetit, duke arritur një shpejtësi marramendëse prej 1.02 petabitësh për sekondë, ekuivalente me 1 milion GB në një distancë prej 1,808 kilometrash (1,118 milje). Kjo është shpejtësi e mjaftueshme për të shkarkuar mbi 10,000 filma 4K në një sekondë të vetme.
Ky rezultat është arritur në kushte laboratorike, duke përdorur një fije optike të veçantë me 19 bërthama dhe duke transmetuar të dhënat në një distancë prej 1,800 kilometrash.
Por kjo shpejtësi rekordthyese nuk ka të bëjë vetëm me shkarkimin më të shpejtë të filmave nga Netflix. Ajo përfaqëson një hap madhor teknologjik drejt epokës së re të informatikës, e cila do të mbështetet fuqishëm në inteligjencën artificiale IA, VR, IoT dhe ekosistemet gjigante të të dhënave në kohë reale.
Infrastruktura e internetit që përdorim sot, sado moderne të jetë, nuk është ndërtuar për të përballuar flukset e mëdha dhe të njëkohshme të të dhënave që kërkojnë teknologjitë më të fundit. Me rritjen e përdorimit të IA-së, automjeteve vetë-drejtuese, pajisjeve të lidhura dhe aplikacioneve të realitetit virtual, nevoja për transmetim të dhënash do të rritet ndjeshëm dhe me ritme shumë më të shpejta.
Kjo sfidë teknologjike ka vënë në provë inxhinierët e telekomunikacionit në të gjithë botën. Edhe pse testet laboratorike me shpejtësi të lartë janë bërë edhe më parë, ruajtja e kësaj performance në distanca të gjata pa humbje apo ndërhyrje në sinjal ka qenë një nga pengesat më të mëdha — dhe ky përparim i fundit japonez tregon se kjo mund të jetë e realizueshme.
Thelbi i këtij arritjeje qëndron në një fibër optike të projektuar posaçërisht që përmban 19 bërthama individuale, secila e aftë të transmetojë të dhëna në mënyrë të pavarur. Fibrat optike tradicionale përmbajnë vetëm një bërthamë, duke kufizuar kapacitetin e tyre.
Pavarësisht këtij rritjeje dramatike në kapacitet, vetë fibra mbetet vetëm 0.125 mm e trashë, e njëjta madhësi si kabllot ekzistuese të fibrave komerciale, duke e bërë atë të pajtueshme me infrastrukturën e sotme.
Kjo u lejon inxhinierëve të rrisin gjerësinë e brezit pa zëvendësuar të gjithë rrjetin, një veçori jetësore për vendosjen në botën reale.
Kjo teknologji e re përfaqëson më shumë sesa thjesht shpejtësi. Është një zgjidhje e besueshme, me distanca të gjata dhe me bandwidth ultra të lartë, e ndërtuar për një botë të ndërlidhur, një botë ku automjetet autonome komunikojnë në kohë reale, inteligjenca artificiale funksionon në procesorë cloud dhe metauniverse gjithëpërfshirëse transmetohen tek përdoruesit në të gjithë globin.
Që nga eksperimentet e hershme me fibrat optike deri te zbulimet e sotme, udhëtimi i komunikimit global ka qenë gjithmonë për thyerjen e kufijve.
Me themelet e hedhura tashmë, bota së shpejti mund të shohë një internet të aftë për të mbështetur çdo gjë që e ardhmja i sjell me shpejtësinë e mendimit.
VINI RE: Ky artikull është pronësi intelektuale e TechStory
Përshtati për Hashtag.al, Aurora Hoxha
