Një zjarr i madh shpërtheu në një depo nafte pranë qytetit turistik rus të Soçit në Detin e Zi, i cili sipas autoriteteve ruse u shkaktua nga një sulm me dron gjatë natës nga Ukraina.
Guvernatori i rajonit Krasnodar, Veniamin Kondratyev, njoftoi se mbetjet e një droni goditën një depo karburanti, duke shkaktuar një zjarr që u përballua nga 127 zjarrfikës të dielën. Zjarri u shua më vonë gjatë ditës, sipas BBC.
Për shkak të incidentit, aeroporti pranë Soçit, i cili ishte vendi i Lojërave Olimpike Dimërore të vitit 2014 – pezulloi përkohësisht fluturimet.
Ndërkohë, Rusia bombardoi sërish një urë të rëndësishme në qytetin jugor të Ukrainës, Kherson, duke vrarë një burrë, sipas autoriteteve lokale. Në qytetin fqinj Mykolaiv, shtatë persona u plagosën dhe disa shtëpi u shkatërruan.
Ukraina kishte raportuar më herët se shtatë persona humbën jetën nga sulmet ruse të së shtunës në rajonet e Khersonit dhe Donetskut.
Autoritetet ruse thanë se sulmi me dron në rafinerinë e Soçit ishte një nga disa të tilla të ndërmarra nga Ukraina gjatë fundjavës.
Objektiva të tjerë u goditën në qytetet ruse të Ryazanit, Penzës dhe Voronezhit – ky i fundit afër kufirit me Ukrainën. Guvernatori i rajonit Voronezh raportoi për katër të plagosur nga një prej sulmeve.
Ukraina nuk ka komentuar zyrtarisht për këto sulme, por është e njohur që Kievi ka synuar infrastrukturën energjetike ruse në shenjë hakmarrjeje për bombardimet e vazhdueshme të Rusisë ndaj rrjetit energjetik ukrainas gjatë luftës.
Ministria ruse e Mbrojtjes njoftoi se mbrojtja ajrore ruse kishte rrëzuar 93 dronë ukrainas gjatë natës, 60 prej të cilëve mbi rajonin e Detit të Zi.
Forcat ajrore të Ukrainës deklaruan se Rusia kishte lëshuar 83 dronë – ose 76 dronë dhe shtatë raketa – gjatë natës, dhe 61 prej tyre u rrëzuan. Ata shtuan se 16 dronë dhe gjashtë raketa goditën objektiva në tetë vende të ndryshme.
Në qytetin e Khersonit, udhëheqësi rajonal Oleksandr Prokudin bëri thirrje për evakuim të pjesshëm pas goditjes së urës kyçe Ostrivsky të dielën në mëngjes.
Kjo urë, e cila lidh lagjen e ishullit Korabel me pjesën tjetër të qytetit, kishte pësuar dëmtime të mëdha nga sulmet e mëparshme të javës.
Sulmet e fundit ruse vijnë pas një jave veçanërisht të përgjakshme për civilët në Ukrainë, përfshirë një sulm të enjten në Kiev që vrau të paktën 31 persona.
Zyrtarët ukrainas thanë se gjatë këtij sulmi u lëshuan mbi 300 dronë dhe tetë raketa lundrimi, duke e cilësuar si një nga sulmet më vdekjeprurëse ndaj kryeqytetit që nga fillimi i pushtimit të plotë rus në shkurt 2022.
Pas këtyre sulmeve, presidenti ukrainas Volodymyr Zelensky kërkoi sanksione më të ashpra ndërkombëtare ndaj Rusisë, ndërsa presidenti amerikan Donald Trump dënoi veprimet e Rusisë në Ukrainë dhe sugjeroi vendosjen e sanksioneve të reja kundër Moskës.
Në korrik, Trump kishte deklaruar se Vladimir Putin kishte 50 ditë kohë për të përfunduar luftën, përndryshe Rusia do të përballej me tarifa të ashpra për eksportet e saj të naftës dhe produkteve të tjera.
Të hënën, Trump caktoi një afat të ri prej “10 apo 12 ditësh”, i cili më pas u shty dhe pritet të skadojë më 8 gusht.
