Ushtria izraelite ka njoftuar të dielën se ka rrëzuar një mjet fluturues pa pilot (dron) që ishte lëshuar nga Jemeni, duke shënuar një tjetër incident në serinë e sulmeve ajrore të lidhura me rebelët Houthi të mbështetur nga Irani.
Droni shkaktoi alarm në komunitetin jugor izraelit të Bnei Netzarim, pranë kufirit me Egjiptin. Forcat Ajrore izraelite e interceptuan dronin menjëherë pasi ai hyri në hapësirën ajrore të Izraelit nga drejtimi i Jemenit. Sipas njoftimit të ushtrisë, nuk ka pasur të lënduar apo dëme materiale.
“Pas sirenave që u dëgjuan më herët për një infiltrim të mundshëm ajror në Bnei Netzarim, një objekt ajror i dyshimtë i nisur nga Jemeni u rrëzua nga Forcat Ajrore Izraelite”, thuhet në deklaratën zyrtare të IDF-së (Forcat e Mbrojtjes të Izraelit), të shpërndarë menjëherë pas incidentit, sipas Ynet.
Vetëm pesë ditë më parë, një tjetër dron ishte rrëzuar nga Izraeli, duke detyruar autoritetet të aktivizojnë sirenat e emergjencës në disa rajone jugore.
Më herët këtë javë, disa dronë të tjerë u interceptuan mbi territorin egjiptian, përfshirë afër komunitetit të Shlomit në Këshillin Rajonal Eshkol, ndërsa të martën u rrëzua edhe një raketë balistike pasi u dëgjuan alarme në Tel Aviv, rajonin e Yarkonit dhe disa zona të Bregut Perëndimor.
Të premten, forcat izraelite rrëzuan një raketë tjetër balistike që aktivizoi alarmet në Izraelin qendror, Jeruzalem, rajonin e Detit të Vdekur dhe në Bregun Perëndimor. Fluturimet në aeroportin Ben Gurion u shtynë përkohësisht si pasojë e alarmit.
Megjithë sulmet e vazhdueshme ajrore nga Izraeli mbi objektivat e Houthive në Jemen, rebelët kanë vazhduar përpjekjet për të goditur territorin izraelit.
Më 21 korrik, IDF sulmoi portin kryesor të kontrolluar nga Houthit në Jemen, duke goditur rezervuarë karburanti, anije që përdoreshin për operacione ushtarake dhe infrastrukturë që, sipas ushtrisë izraelite, mbështet “aktivitetet terroriste kundër Izraelit dhe objektivave detare në rajon.”
