Qyteti i Pogradecit do të jetë mikpritës i Maratonës Kombëtare dhe Ndërkombëtare më 26 korrik 2025, një nga ngjarjet më të rëndësishme sportive të sezonit veror. Aktiviteti organizohet nga shoqata “Maraton Albania”, në bashkëpunim me Bashkinë e Pogradecit, dhe do të nisë në orën 19:00.
Maratona do të zhvillohet në dy kategori:
Gjysmë-maratona (21 km) do të nisë nga fshati Lin dhe do të përshkojë rrugën buzë liqenit deri në qendër të qytetit.
Mini-maratona (10 km) do të zhvillohet në itinerarin Pogradec – Buçimas – Tushemisht, për të përfunduar sërish në pikën e nisjes, duke kaluar përmes shëtitores dhe unazës së qytetit.
Për të garantuar sigurinë publike dhe rrjedhën e pandërprerë të aktivitetit, Policia e Shtetit ka marrë masa të shtuara. Do të ketë prani të shtuar të forcave të rendit dhe do të ndërpritet përkohësisht qarkullimi i automjeteve në disa akse rrugore:
Në aksin Lin–Pogradec do të bllokohet krahu i majtë i rrugës.
Në segmentin Tushemisht–Pogradec, do të bllokohen të dy korsitë.
Do të ketë gjithashtu kufizime dhe bllokime në disa rrugë të brendshme të qytetit.
Kufizimet do të jenë në fuqi nga ora 19:00 deri në 21:00.
Policia e Qarkut Korçë i bën thirrje qytetarëve për mirëkuptim dhe bashkëpunim, duke falënderuar të gjithë ata që kontribuojnë në mbarëvajtjen e këtij eventi sportiv në mënyrë të sigurt dhe dinjitoze.
