Me përfundimin e afërt të punimeve në Aeroportin Ndërkombëtar të Vlorës, qeveria shqiptare ka marrë vendimin për hapjen zyrtare të pikës së kalimit kufitar në këtë aeroport, në përputhje me të gjitha rregullat ndërkombëtare për qarkullimin e shtetasve në hyrje dhe dalje.
Vendimi, i marrë nga Këshilli i Ministrave dhe i propozuar nga Ministria e Brendshme, u miratua në mbështetje të nenit 100 të Kushtetutës dhe të ligjit nr. 71/2016 “Për kontrollin kufitar”, duke formalizuar kështu funksionalizimin e aeroportit si një portë ndërkombëtare ajrore për Shqipërinë.
Detajet e vendimit:
Hapet pika e kalimit kufitar në Aeroportin Ndërkombëtar të Vlorës, duke lejuar qarkullimin ndërkombëtar të udhëtarëve nga dhe drejt Shqipërisë përmes këtij aeroporti.
Për zbatimin e vendimit janë ngarkuar:
Ministria e Brendshme
Ministria e Infrastrukturës dhe Energjisë
Ministria e Financave
Ministria e Bujqësisë dhe Zhvillimit Rural
Ky vendim hyn në fuqi pas botimit në Fletoren Zyrtare, duke i hapur rrugë përgatitjeve për funksionimin e plotë të strukturave kufitare, doganore dhe të kontrollit fitosanitar në aeroportin e ri.
