Kryeministri izraelit Benjamin Netanyahu pritet të zhvillojë një takim të rëndësishëm të dielën në mbrëmje me një grup të vogël ministrash për të diskutuar mbi vijimin e negociatave për një marrëveshje të mundshme për lirimin e pengjeve. Burime për The Jerusalem Post bëjnë me dije se në qendër të takimit do të jetë miratimi ose jo i hartave të reja të propozuara në bisedimet e Dohas, një pikë që ka shkaktuar mjaft debat ditët e fundit.
Ndërkohë, zyrtarë palestinezë thanë për BBC se negociatat për pengjet dhe armëpushimin janë në rrezik të kolapsit. Sipas tyre, Netanyahu qëllimisht ka dërguar një delegacion në Doha pa kompetenca vendimmarrëse, vetëm për të fituar kohë gjatë vizitës së tij në SHBA.
Çështjet kyçe që ndajnë palët:
Izraeli kërkon të mbajë prezencë të forcave të IDF gjatë armëpushimit 60-ditor.
Hamas kërkon:
Ndërprerje të plotë të operacioneve ushtarake.
Tërheqje të trupave izraelite nga Gaza.
Garanci për një armëpushim të përhershëm.
Rritje të ndihmës humanitare.
Një zyrtar i lartë i Zyrës së kryeministrit izraelit konfirmoi më vonë të shtunën se Izraeli ka pranuar propozimin e Katarit për marrëveshjen, i bazuar në planin Witkoff, por Hamas e ka refuzuar atë.
Sipas zyrtarit izraelit, bisedimet kanë vazhduar edhe gjatë sabatit me ndërmjetësit e Katarit dhe Egjiptit, dhe delegacioni izraelit në Doha ka pasur një mandat të qartë bazuar në propozimin kataras. Ai akuzoi Hamasin se po ushtron luftë psikologjike dhe po pengon qëllimisht negociatat duke refuzuar të bëjë kompromise.
Ndërsa presioni ndërkombëtar për një marrëveshje rritet, situata në terren dhe në tavolinën e negociatave mbetet e tensionuar dhe e pasigurt.
