Katër emigrantë kanë humbur jetën dhe rreth 20 të tjerë rezultojnë të zhdukur pasi një varkë e mbushur me refugjatë dhe emigrantë u përmbys në brigjet e Republikës Dominikane, njoftuan autoritetet vendase.
Sipas Al Jazeera, autoritetet e mbrojtjes civile konfirmuan se 17 persona janë shpëtuar, përfshirë 10 shtetas dominikanë dhe 7 haitianë. Mes të mbijetuarve ndodhet edhe një fëmijë.
Varka e vogël, e ndërtuar nga dru ose fibër qelqi dhe e quajtur “yola”, nuk përmbushte asnjë standard sigurie, sipas autoriteteve. Ajo po tentonte të mbërrinte në Puerto Rico, territor amerikan, ku emigrantët shpresonin për një jetë më të mirë.
Refugjatët dhe emigrantët nga Haiti dhe Republika Dominikane shpesh paguajnë deri në 7 mijë dollarë për një udhëtim të rrezikshëm me varka të tilla drejt Puerto Ricos. Ky fenomen është rritur ndjeshëm në dekadën e fundit.
Një incident i ngjashëm ndodhi në vitin 2022, kur një varkë e dyshuar për trafik të qenieve njerëzore u përmbys pranë ishullit Mona, duke shkaktuar vdekjen e 5 personave dhe shpëtimin e 66 të tjerëve.
Ishulli Mona, një zonë e mbrojtur natyrore midis Republikës Dominikane dhe Puerto Ricos, është shndërruar prej vitesh në një rrugë të zakonshme për kontrabandistët që transportojnë emigrantë — kryesisht dominikanë dhe haitianë — mes dy vendeve.
Operacionet e kërkim-shpëtimit janë ende në vazhdim, ndërsa shpresat për të gjetur të mbijetuar të tjerë po veniten. Autoritetet kanë nisur hetime për zbardhjen e plotë të ngjarjes dhe identifikimin e rrjeteve të trafikimit të njerëzve që qëndrojnë pas këtyre udhëtimeve të rrezikshme.
