Vala e tretë e nxehtësisë mbërthen Britaninë e Madhe, me temperatura që arrijnë deri në 34 °C, duke shënuar ditën më të nxehtë të vitit deri tani. Në Skoci, Irlandën e Veriut dhe Uells janë regjistruar temperatura rekord për vitin 2025, me mbi 30 °C në disa zona si Aviemore dhe Magilligan. Në Cardiff, Wales, termometri ka shënuar 33.1 °C.
Agjencia e Sigurisë Shëndetësore ka lëshuar alerte portokalli për disa rajone të Anglisë, duke paralajmëruar rritje të rrezikut të vdekjeve, sidomos te personat mbi 65 vjeç dhe ata me sëmundje kronike, përcjell BBC.
Për shkak të kërkesës së lartë për ujë, disa kompani ujësjellësesh kanë vendosur ndalime për përdorimin e hortumeve në rajone si Yorkshire, Kent dhe Sussex. South East Water ka njoftuar fillimin e ndalimit më 18 korrik për disa zona, pasi nivelet e konsumit kanë arritur rekord.
Ekspertët rekomandojnë hidratim të mirë, qëndrim në hije, përdorim të kremrave mbrojtës dhe kufizim të aktiviteteve fizike gjatë orëve më të nxehta. Gjithashtu, këshillohet kujdes i veçantë për të moshuarit dhe fëmijët.
Meteorologët parashikojnë që vala e nxehtësisë do të vazhdojë deri më 14 korrik, pas së cilës pritet rënie e temperaturave dhe reshje.
Kjo valë nxehtësie është një sinjal i rëndësishëm për ndikimin e ndryshimeve klimatike dhe nevojën për masa mbrojtëse ndaj shëndetit dhe burimeve natyrore.
