Izz al-Din al-Haddad, udhëheqësi aktual i Hamasit në Gaza, ka deklaruar së fundmi se ai ose do të arrijë një “marrëveshje të ndershme” për t’i dhënë fund luftës në Gaza, ose do të vazhdojë lufta si një “luftë çlirimi ose një luftë dëshmorësh”, sipas raportimeve të New York Times.
Gazeta shkruan se ai është i përfshirë thellësisht në negociatat aktuale për një armëpushim dhe një marrëveshje për lirimin e pengjeve, përcjell Ynet.
Të enjten, zëdhënësi i Forcave të Mbrojtjes së Izraelit (IDF), Effi Defrin, u pyet se kush është ai që merr vendimet brenda Hamasit dhe ai përmendi emrin e al-Haddad. “Ai ndodhet në veri të Gazës dhe nuk do të them më shumë,” tha Defrin.
Sipas zyrtarëve të inteligjencës perëndimore, të cituar në raportin e New York Times, Haddad është i vetmi anëtar i lartë i Hamasit që ka mbijetuar deri më tani luftën dhe atentatet e përsëritura të Izraelit.
Ai ndodhet në qytetin e Gazës dhe thuhet se ka mbijetuar të paktën gjashtë përpjekje për ta vrarë. Ai konsiderohet si një nga udhëheqësit më të njohur të krahut ushtarak të Hamasit.
Haddad, i cili është në të 50-at e tij, mori pjesë në masakrën e 7 tetorit. Ai flet hebraisht dhe ka mbajtur pengje në veri të Gazës, përfshirë vrojtueset femra të ushtrisë izraelite (IDF), të cilat u liruan në janarin e kaluar gjatë armëpushimit të fundit dhe shkëmbimit të pengjeve.
Keith Siegel, një izraelito-amerikan i cili u lirua nga robëria në janar, tregoi se kishte takuar Haddad në Gaza.
“Më pyeti si isha dhe nëse po më trajtonin mirë, në hebraisht të përsosur,” tha Siegel. “Ai ishte përgjithësisht i sjellshëm, përveç kur [gruaja ime] Aviva shkoi në Zvicër dhe deklaroi në intervista se Hamasi po torturonte pengjet.”
Siegel përshkroi gjithashtu një moment kur Haddad u shfaq me maskë fytyre dhe me një kapuç leshi. “E kuptova që ai ishte i shqetësuar se ndonjëri nga rojet mund të ishte burim informacioni për inteligjencën izraelite,” tha ai.
Para se Siegel të lirohej, Haddad i solli atij një dhuratë me çokollata për gruan e tij dhe të dy burrat ecën bashkë përgjatë bregdetit. “Kur pa që isha nervoz, më tha: ‘Ji i lumtur. Po shkon në shtëpi.’”
Sipas një burimi të inteligjencës që foli për New York Times, Haddad e sheh rezistencën ndaj Rusisë në Çeçeni në fillim të viteve ’90 si një model që Hamasi duhet të ndjekë.
Në luftën e parë midis republikës myslimane dhe Rusisë, që zgjati dy vite, rusët nuk arritën asnjë nga objektivat e tyre ushtarake dhe mijëra ushtarë humbën jetën.
Izz al-Din al-Haddad nuk pritet të heqë dorë nga kërkesa e tij për përfundimin e luftës dhe tërheqjen e trupave izraelite nga Rripi i Gazës.
