Drejtori Ekzekutiv i Meta-s, Mark Zuckerberg, ka njoftuar formimin e Meta Superinteligence Labs (MSL), një divizion i ri i dedikuar ndërtimit të sistemeve të IA-së që tejkalojnë aftësitë njerëzore. Nisma e zbuluar të hënën, bashkon ekipet kryesore të kërkimit dhe produkteve të IA-së të Meta-s nën një flamur, me qëllimin e deklaruar për të ofruar “superinteligjencë personale për të gjithë”.
Në krye të laboratorit të ri është Alexandr Ëang, themeluesi 28-vjeçar i Scale AI, i cili i bashkohet Meta-s si Drejtor i IA-së pas investimit të raportuar prej 14 miliardë dollarësh të kompanisë në firmën e tij të etiketimit të të dhënave. Ai shoqërohet nga Nat Friedman, ish-drejtor ekzekutiv i GitHub, dhe një ekip inxhinierësh të lartë të IA-së nga OpenAI, DeepMind dhe Anthropic.
“Ndërsa ritmi i përparimit të IA-së përshpejtohet, zhvillimi i superinteligjencës po del në pah. Unë besoj se ky do jetë fillimi i një epoke të re për njerëzimin, dhe unë jam plotësisht i përkushtuar për të bërë atë që duhet që Meta të udhëheqë rrugën”, shkroi Zuckerberg në një memo të brendshme, duke e përshkruar këtë veprim si një pikë kthese historike, shkruan RT.
Prezantimi i MSL vjen mes konkurrencës në rritje midis gjigantëve të teknologjisë amerikane dhe rivalitetit në rritje me Kinën. Në janar, zhvilluesit dhe investitorët perëndimorë të teknologjisë u tronditën nga rritja e startup-it kinez të inteligjencës artificiale DeepSeek, i cili pretendoi se produkti i tij ishte superior ndaj ChatGPT të OpenAI në metrikat kryesore të kostos operative.
