Renault po pëson një humbje prej 9.5 miliardë eurosh nga aksionet e saj në Nissan pas një ndryshimi në mënyrën se si prodhuesi francez i makinave llogarit pjesëmarrjen te partneri i saj japonez në vështirësi.
Renault ka qenë duke ristrukturuar aleancën e saj 26-vjeçare me Nissan dhe po e zvogëlon dalëngadalë pjesëmarrjen e saj në grupin japonez, i cili dikur ishte deri në 43 përqind, në 10 përqind.
Ky proces është ndërlikuar nga çmimi në rënie i aksioneve të Nissan, i cili ka rënë me pothuajse 40 përqind gjatë vitit të kaluar. Renault aktualisht zotëron 36 përqind të aksioneve në Nissan, duke përfshirë një pjesë prej 18.7 përqind të aksioneve të mbajtura në një fond francez që dëshiron ta shesë, shkruan FT.
Të martën, Renault tha se një metodë e re kontabiliteti do përafronte vlerën e aksioneve të saj me çmimin e aksioneve të Nissan, duke çuar në humbjen jo-monetare në rezultatet e saj për gjashtë muajt deri më 30 qershor, të cilat do t’i publikojë më vonë këtë muaj.
“Edhe pse ky ndryshim kontabël nënkupton një përshtatje të rëndësishme në pasqyrat financiare të Grupit Renault, ai nuk ndryshon zotimet strategjike dhe operacionale midis Grupit Renault dhe Nissan,” tha Renault.
Grupi francez tha se ndryshimet – të cilat u shkaktuan nga zbatimi i rregullave të IFRS – nuk do ndikonin në paratë e tij ose në llogaritjen e dividentëve të tij.
Humbja e jashtëzakonshme vjen pas largimit të papritur të drejtorit ekzekutiv Luca de Meo për të drejtuar grupin luksoz “Kering”, gjë që uli ndjeshëm aksionet e Renault pas njoftimit muajin e kaluar.
Para përditësimit të së martës, Renault kishte tejkaluar rivalët e saj për shkak të ekspozimit të saj të kufizuar ndaj luftës tregtare të SHBA-së dhe rritjes së konkurrencës në tregun kinez.
De Meo u largua nga kompania ndërsa ishte gati të përshkruante fazën e dytë të strategjisë së saj të rritjes për Renault, duke e ringjallur atë nga një grup me humbje në vështirësi në një grup me një marzh rekord fitimi.
Ndërkohë, Nissan po ecën përpara me masa të gjera ristrukturimi që përfshijnë mbylljen e 7 nga 17 fabrikave të saj dhe shkurtimin e 20,000 vendeve të punës në nivel global nën drejtimin e drejtorit të ri ekzekutiv Ivan Espinosa.
Grupi japonez kishte zhvilluar më parë bisedime bashkimi me Honda, por Renault i kishte kërkuar Nissan të negocionte një prim më të lartë nga rivali i saj më i madh.
Renault kishte qenë i hapur për një bashkim midis dy grupeve japoneze, por dështimi i bisedimeve e ka ndërlikuar rrugën e saj drejt uljes së pjesëmarrjes së saj në Nissan.
