Kim Jong Un personalisht preu shiritin e një vendpushimi të ri të cilësuar nga media shtetërore si një “qytet turizmi në nivelin e thesarit kombëtar” – një zhvillim luksoz bregdetar i vendosur kundër asaj që vëzhguesit e të drejtave të njeriut e përshkruajnë si pamje të zymta të urisë dhe vështirësive në gjithë Korenë e Veriut, shkruan CNN.
Sipas shërbimit zyrtar të lajmeve KCNA të vendit, Kim hapi resortin e gjerë bregdetar Kalma me parqe ujore, hotele shumëkatëshe dhe dhoma për gati 20,000 mysafirë – një shfaqje gjithëpërfshirëse e ekstravagancës në një nga vendet më të izoluara në botë.
Zona turistike bregdetare Wonsan-Kalma, e zbuluar në një ceremoni më 24 qershor, është në bregdetin lindor të Koresë së Veriut. KCNA raportoi se “shërbimi për mysafirët vendas do fillojë më 1 korrik”, por nuk dha hollësi të tjera.
Më parë këtë muaj, Koreja e Veriut njoftoi hapjen e stacionit të trenit Kalma, duke raportuar se është ndërtuar për të “siguruar një nivel të lartë komoditeti për udhëtarët në zonën turistike bregdetare”. Resorti bregdetar Kalma është pranë një aeroporti ndërkombëtar, një tjetër tregues se projekti synon tërheqjen e valutës së huaj.
Pjesëmarrja ndërkombëtare në prerjen e shiritit ishte e kufizuar vetëm për ambasadorin dhe stafin rus, një shenjë respekti për afrimin në rritje të Phenianit me Moskën mes thellimit të izolimit nga Perëndimi nën regjimin autoritar të Kim.
