Deputetja e Partisë Demokratike, Jorida Tabaku, ka reaguar me tone të ashpra përmes një videoje në rrjetet sociale, ku ka denoncuar rritjen e papërballueshme të çmimeve në Shqipëri, duke e cilësuar këtë një realitet të padrejtë për qytetarët. Sipas saj, Shqipëria tashmë konkurron me Bashkimin Europian vetëm në çmime, ndërsa standardi i jetesës mbetet shumë poshtë nivelit europian.
Duke iu referuar të dhënave zyrtare për vitin 2025, Tabaku thekson se çmimet e produkteve bazë si djathi, qumështi, vezët dhe vaji janë 25 deri në 30 për qind më të larta se mesatarja e Bashkimit Europian. Situata është edhe më shqetësuese për çmimet e karburantit, që sipas saj kanë arritur nivele të krahasueshme me Zvicrën, duke kapur kufirin e dy dollarëve për litër, ndonëse të ardhurat për frymë në Shqipëri janë vetëm 40 për qind e mesatares europiane.
Në reagimin e saj, Tabaku nënvizon kontrastin e fortë midis pagave dhe çmimeve, duke e përmbledhur gjendjen me shprehjen: “Paga afrikane, çmime europiane!”. Ajo shton se kjo situatë është pasojë e një modeli ekonomik të dështuar, i kapur nga një pakicë, që ka mbyllur tregjet dhe ka penguar konkurrencën.
Deputetja demokrate kërkon ndërhyrje të menjëhershme për të rikthyer ekonominë në funksion të shumicës së qytetarëve, duke i dhënë fund padrejtësisë ekonomike që, sipas saj, po rëndon mbi familjet shqiptare. Në përmbyllje të deklaratës, ajo ngre pyetjen:
“Përse qytetarët shqiptarë duhet të paguajnë më shumë se europianët për të njëjtat produkte, kur kanë më pak të ardhura?”, duke shtuar se ky realitet duhet ndryshuar pa vonesë.
