Presidenti i SHBA-së, Donald Trump, tha në një postim të martën se nuk kishte aspak dëshirë për të negociuar me Iranin pasi regjimi në Teheran nuk arriti të pranonte marrëveshjen bërthamore të propozuar prej tij.
Në një postim në platformën e tij Truth Social, Trump tha se nuk i ishte drejtuar Iranit për bisedime paqeje në asnjë mënyrë a formë. Irani “duhet ta kishte pranuar marrëveshjen që ishte në tryezë”, tha Trump në një postim në Truth Social, shkruan Ynet.
Trump u tha gazetarëve në Air Force One, gjatë kthimit nga takimi i G7 në Kanada, se donte që Irani të hiqte dorë tërësisht nga programi i tij bërthamor. Trump u largua nga samiti herët për t’u kthyer në Uashington mes spekulimeve se Shtetet e Bashkuara mund t’i bashkohen Izraelit në sulmet ndaj Iranit përtej ndihmës së ofruar në mbrojtjen kundër raketave iraniane.
Por ai tha gjithashtu se po shqyrtonte dërgimin e të dërguarit të tij, Steve Witkoff dhe zëvendëspresidentit J.D. Vance për t’u takuar me Ministrin e Jashtëm të Iranit për të rënë dakord për një marrëveshje bërthamore.
Zëdhënësi i Ministrisë së Jashtme të Iranit, Esmail Baqaei, i bëri thirrje botës të ndërmarrë hapa urgjentë për t’i dhënë fund luftës. “Ne theksojmë nevojën për të ndërmarrë urgjentisht hapa ndërkombëtarë dhe rajonalë për të ndaluar luftën që iu imponua Iranit”, tha ai.
Agjencia e lajmeve Fars e Iranit raportoi se komandanti i forcave tokësore të Iranit kërcënoi me një raund të ri sulmesh “që do intensifikoheshin në orët në vijim”.
Një vlerësim i inteligjencës amerikane kundërshtoi pretendimin e Izraelit se Irani ishte afër prodhimit të një arme bërthamore, raportoi CNN të martën. Zyrtarët madje kundërshtuan pohimin e Izraelit se Irani po kërkonte aftësi bërthamore.
