Rreth 27 mijë maturantë në të gjithë vendin do t’i nënshtrohen të martën, më 18 qershor, provimit të tretë të maturës shtetërore , atij te matematikës.
Sipas njoftimit të Ministrisë së Arsimit dhe Sportit, nxënësit duhet të jenë në ambientet e shkollës në orën 08:30, ndërsa provimi nis në orën 10:00 dhe përfundon në 12:30.
Për herë të parë, këtë vit janë përgatitur teste të personalizuara për maturantët me aftësi të kufizuara, në kuadër të një qasjeje gjithëpërfshirëse dhe të barabartë në procesin e vlerësimit.
Janë ngritur 145 qendra testimi në përputhje me standardet e nevojshme, ndërsa në procesin e vlerësimit janë angazhuar 640 mësues.
Rregulla gjatë provimit:
Nxënësit duhet të kenë me vete mjet identifikimi (kartë ID ose pasaportë);
Gjatë provimit nxënësit duhet të kenë veshje të rregullt, uniforma e shkollës;
Gjatë kohës që zhvillohet provimi ndalohen rreptësisht: telefonat dhe ora smart;
Nxënësit duhet të përdorin stilolaps me një ngjyrë dhe kurrë më shumë se një ngjyrë në plotësimin e testit;
Firmosni kur merrni dhe dorëzoni testin;
Kontrolloni testin për pasaktësi ose paqartësi në lexim;
Nuk lejohet largimi para 12:30;
Sjellje korrekte dhe vëmendje gjatë testit.
Provimi i fundit që do të zhvillojnë është ai me Zgjedhje më 24 qershor.
