Irani ka ndërmarrë një sulm të ri raketor kundër Izraelit gjatë natës, duke përshkallëzuar më tej konfliktin mes dy vendeve, që tashmë ka hyrë në ditën e katërt. Situata është tejet e tensionuar, me një numër në rritje viktimash dhe thirrje të forta nga komuniteti ndërkombëtar për ulje te tensioneve .
Gjatë natës, Irani nisi një valë të re raketash drejt Izraelit qendror. Sirenat e alarmit dhe sistemet e mbrojtjes ajrore u aktivizuan në të gjithë vendin, përfshirë kryeqytetin Tel Aviv dhe Jerusalemin.
Disa ndërtesa banimi janë goditur dhe shpërthime të mëdha janë raportuar pranë një rafinerie në qytetin bregdetar të Haifës. Gjithashtu, rrjeti elektrik në zonën qendrore të Izraelit është dëmtuar rëndë. Më herët gjatë ditës, sipas mediave iraniane, Irani kishte lëshuar qindra raketa që synonin ndërtesa banimi dhe infrastrukturë në territorin izraelit.
Ndërkohë, në Tel Aviv, mëngjesi solli imazhe të rrugëve të mbuluara me mbeturina, dritare të thyera dyqanesh dhe ndërtesa të dëmtuara rëndë. Banorët, të traumatizuar, përqafoheshin mes rrënojave, ndërsa ekipet e shpëtimit kontrollonin zonat e goditura.
Bilanci i viktimave po rëndohet gjithnjë e më shumë. Të paktën pesë persona janë vrarë në Izrael gjatë natës, duke e çuar numrin e përgjithshëm të të vrarëve që prej fillimit të konfliktit në 19. Në anën tjetër, në Iran raportohet për të paktën 224 të vdekur dhe 1,277 të plagosur, shumica prej të cilëve janë civilë, sipas autoriteteve iraniane dhe mediave shtetërore.
Ushtria izraelite deklaroi se ka ndërmarrë kundërsulme ajrore, duke goditur qendrat e komandës të Forcës Quds, një krah i Gardës Revolucionare të Iranit. Sulmet izraelite më herët gjatë ditës kishin në shënjestër vendet e raketave dhe objektiva të tjera ushtarake në Iran, duke vrarë edhe shefin e inteligjencës së Gardës Revolucionare.
Nga ana tjetër, dy zyrtarë amerikanë i thanë CNN se presidenti amerikan kishte refuzuar një propozim izraelit për të eliminuar Udhëheqësin Suprem të Iranit, Ajatollah Ali Khamenei. Kryeministri izraelit Netanyahu i mohoi kategorikisht raportimet për një plan të tillë.
Ish-presidenti amerikan Donald Trump deklaroi se dëshiron të shohë një marrëveshje midis Izraelit dhe Iranit dhe beson se ekziston “një shans i mirë” që kjo të ndodhë, megjithëse shtoi se “nganjëherë ata duhet ta luftojnë atë.”
Tensionet e mëdha kanë sjellë edhe paralajmërime nga të dyja palët për qytetarët që të largohen nga zonat afër objekteve ushtarake, për arsye sigurie. Në Teheran, frika është përhapur ndjeshëm mes popullatës, me radhë të gjata makinash pranë stacioneve të karburantit, teksa shumë banorë përpiqen të largohen nga kryeqyteti.
Ndërkohë, kriza ka prekur edhe tregjet ndërkombëtare të energjisë. Çmimet e naftës kanë vijuar të rriten të dielën, duke shtuar edhe më shumë presion në tregjet globale, pas një rritjeje prej 7% gjatë javës së kaluar, ndërsa frika për një ndërprerje të furnizimeve energjetike është shtuar.
