Policia izraelite ka arrestuar dy shtetas izraelitë të shtunën, në një hetim të përbashkët me agjencinë e sigurisë Shin Bet, nën dyshimin se kanë kryer vepra penale të sigurisë nën drejtimin e Iranit. Arrestimet ndodhën një ditë pas sulmeve të para të Izraelit ndaj Iranit, si pjesë e Operacionit “Rising Lion”, përcjell YNetNews.
Ky nuk është rasti i parë i dyshuar për bashkëpunim mes izraelitëve dhe operativëve iranianë. Tre ditë para fillimit të luftës, një 13-vjeçar nga Tel Avivi u arrestua nga Shin Bet dhe Policia e Tel Avivit, pasi dyshohej se kishte kryer detyra për agjentë iranianë. Ai ishte kontaktuar përmes aplikacionit Telegram dhe ishte paguar për të kryer veprime të ndryshme, përfshirë spërkatjen e grafiteve në disa vende në Tel Aviv.
Muajin e kaluar, dy shtetas izraelitë, Roy Mizrahi dhe Almog Atias, u akuzuan për kryerjen e detyrave të mbledhjes së inteligjencës për agjentë iranianë. Sipas aktakuzës, ata ishin udhëzuar të instalonin kamera survejimi nëpër Izrael dhe të transferonin objekte të ndryshme.
Ndërkohë, rrjeti libanez Al-Mayadeen, i lidhur me Hezbollahun, raportoi se inteligjenca iraniane ka siguruar një sasi të madhe dokumentesh dhe informacioni strategjik të ndjeshëm në lidhje me Izraelin.
